Մենք գիտենք, որ պատերազմի ընթացքում բազմաթիվ զինծառայողներ ու քաղաքացիական անձիք գերի են ընկել Ադրբեջանում։ Ադրբեջանի բանտերում ու այլ պահման վայրերում սպասում են իրենց փոխանակմանը և իրենց ճակատագրին։
Այս մասին ֆեյսբուքյան իր էջում տեսանյութի միջոցով ասաց Ազգային ժողովի «Լուսավոր Հայաստան» խմբակցության պատգամավոր Էդմոն Մարուքյանը։
«Տեղեկություն է տարածվել, որ Ադրբեջանը ծրագրում է հաղթական շքերթ կազմակերպել, որի ժամանակ նրանք ուզում են այնտեղով անցկացնել Զինված ուժերից առգրաված մեքենաներ, զրահամեքենաներ, ինչպես նաև, ըստ տեղեկության, նաև ռազմագերիներին։ Սա արգելված է Ժնևյան կոնվենցիաներով՝ Երկրորդ համաշխարհային պատերազմից հետո և սրա հետ կապված դիմել ենք ՄԱԿ-ի գլխավոր քարտուղարին, Եվրոպայի խորհրդի գլխավոր քարտուղարին, Եվրոպայի խորհրդի խորհրդարանական վեհաժողովի նախագահին և նրանք էլ իրենց հերթին դիմում են Ադրբեջանին, որ սա տեղի չունենա և գրեթե վստահ եմ, որ հայ ռազմագերիներին որևէ ձևով չեն կարող այլևս օգտագործել և դուրս հանել իրենց ռազմական շքերթին»,-ասաց Մարուքյանը՝ նշելով նաև իրենց կողմի արված մյուս քայլերը։
