ՀՀ ֆինանսների նախարարությունը հանրային քննարկման է ներկայացրել խաղասրահ մուտք գործլ և ինտերնետային կայքում գրանցվել ցանկացող ֆիզիկական անձի անձնագիրը կամ անձնագիրը հաստատող այլ փաստաթուղթ ստուգելու կարգը:
Նախագծի համաձայն կարգն է.
- Սույն կարգը կարգավորում է վիճակախաղի կազմակերպիչների (այսուհետ՝ Կազմակերպիչ) կողմից խաղասրահ մուտք գործել և ինտերնետային կայքում գրանցվել ցանկացող ֆիզիկական անձի անձնագրի կամ անձը հաստատող այլ փաստաթղթի (որը պարունակում է տվյալներ նրա տարիքի վերաբերյալ) ստուգման հետ կապված հարաբերությունները:
- Կազմակերպչի կողմից խաղասրահ մուտք գործել ցանկացող ֆիզիկական անձի անձնագրի կամ անձը հաստատող այլ փաստաթղթի ստուգումն (այսուհետ՝ ստուգում) իրականացվում է՝ բացառելով տասնութ տարին (տոտալիզատորի դեպքում՝ քսանմեկ տարին) չլրացած անձանց մուտքը խաղասրահներ (բուքմեյքերական գրասենյակ):
- Ստուգումն իրականացվում է խաղասրահ մուտք գործել ցանկացող ֆիզիկական անձի ներկայությամբ՝ ՀՀ կառավարության 22.12.1999թ. «Անձը հաստատող փաստաթղթի մասին» N 767 որոշմամբ սահմանված անձը հաստատող փաստաթղթի հիման վրա:
- Խաղասրահ (բուքմեյքերական գրասենյակ) մուտք գործել ցանկացող ֆիզիկական անձը Կազմակերպչի պահանջով ստուգման նպատակով վերջինիս առձեռն տրամադրում է անձնագիրը կամ Հայաստանի Հանրապետության օրենսդրությամբ սահմանված անձը հաստատող այլ փաստաթուղթը:
- Համապատասխան Ստուգումն իրականացնելուց հետո Կազմակերպիչը խաղասրահ (բուքմեյքերական գրասենյակ) մուտք գործել ցանկացող ֆիզիկական անձին է վերադարձնում անձնագիրը կամ անձը հաստատող այլ փաստաթուղթը:
- Ներկայացված փաստաթղթերի ստուգումն իրականացնելուց հետո Կազմակերպիչը հավաստիանում է նաև Լիազոր մարմնի կողմից տրամադրված՝ օրինական ուժի մեջ մտած վճռով մոլեխաղերով հրապուրվելու հետևանքով իր ընտանիքը նյութական ծանր դրության մեջ դնելու հիմքով սահմանափակ գործունակ ճանաչված անձանց ցուցակում տվյալ անձի անվան բացակայության վերաբերյալ, որից հետո ֆիզիկական անձին թույլատրվում է մուտք գործել դեպի խաղասրահներ (բուքմեյքերական գրասենյակ):
- Մինչև ֆիզիկական անձանց ինտերնետային կայքում գրանցելը՝ Կազմակերպիչն իրականացնում է ինտերնետ տոտալիզատորին մասնակցել ցանկացող ֆիզիկական անձանց ինքնության ստուգում (նույնականացում)՝ բացառելով քսանմեկ տարին չլրացած ֆիզիկական անձանց մասնակցությունը ինտերնետ տոտալիզատորին:
- Նույնականացման քարտերի մասին» Հայաստանի Հանրապետության օրենքով նախատեսված նույնականացման քարտ և էլեկտրոնային ստորագրություն ունենալու դեպքում ինտերնետային կայքում գրանցվել ցանկացող ֆիզիկական անձի ինքնության ստուգումն (նույնականացում) իրականացվում է Կազմակերպչի կողմից էլեկտրոնային տեղեկատվական համակարգի միջոցով անձնական տվյալների փոխանցմամբ: Գրանցվել ցանկացող ֆիզիկական անձը լրացնում է ինտերնետային կայքում գրանցման համար նախատեսված դաշտերը և ստորագրում (վավերացնում) է էլեկտրոնային ստորագրությամբ:
- Սույն Կարգի 8-րդ կետով սահմանված գործընթացի իրականացումից հետո՝ Կազմակերպիչը քսանմեկ տարին լրացած ֆիզիկական անձի էլեկտրոնային փոստին կամ բջջային հեռախոսահամարին ուղարկում է նույնականացման բանալի և գաղտնաբառ (ID և password), որով հավաստում է Կազմակերպչի ինտերնետային կայքում բարեհաջող գրանցումը:
- Նույնականացման բանալին ու գաղտնաբառն (ID և password) օգտագործվում են ֆիզիկական անձի կողմից ինտերնետ տոտալիզատորին մասնակցության նպատակով Կազմակերպչի ինտերնետ կայք մուտք գործելու համար:
- «Նույնականացման քարտերի մասին» Հայաստանի Հանրապետության օրենքով նախատեսված նույնականացման քարտ կամ էլեկտրոնային ստորագրություն չունենալու դեպքում, ֆիզիկական անձինք ինտերնետ տոտալիզատորին մասնակցելու նպատակով Կազմակերպչի ինտերնետային կայքում գրանցվելու համար պետք է մեկ անգամ այցելեն Կազմակերպչի համապատասխան խաղասրահ (բուքմեյքերական գրասենյակ)՝ սույն կարգի 2-րդ, 3-րդ, 4-րդ, 5-րդ և 6-րդ կետերով սահմանված կարգով Կազմակերպչի կողմից ստուգումն անցնելու նպատակով:
- Ներկայացված փաստաթղթերի ստուգումն իրականացնելուց հետո Կազմակերպիչը քսանմեկ տարին լրացած ֆիզիկական անձին տրամադրում է նույնականացման բանալի և գաղտնաբառ (ID և password), որը հնարավորություն է տալիս նրան մուտք գործել Կազմակերպչի ինտերնետային կայք և մասնակցել ինտերնետ տոտալիզատորին:
- Օտարերկրյա (ոչ ռեզիդենտ) քաղաքացիների համար Կազմակերպիչն ինքնության ստուգումն (նույնականացում) իրականացվում է Կազմակերպչի կողմից էլեկտրոնային տեղեկատվական համակարգի միջոցով անձնական տվյալների փոխանցմամբ, եթե այն չի հակասում ՀՀ միջազգային պայմանագրերով ստանձնած պարտավորություններին:
