ՀՀ քաղաքաշինության, տեխնիկական և հրդեհային անվտանգության տեսչական մարմնի Կոտայքի տարածքային բաժնի մասնագետների կողմից՝ 2020 թվականի փետվար ամսվա ընթացքում ստուգումներ են իրականացվել ՀՀ Կոտայքի մարզի տարածքում գտնվող «Թամարա և Անի» ՍՊ և «Բեկոն Պրոդուկտ» ՍՊ ընկերություններում։
Այս մասին տեղեկացնում են քաղաքաշինության, տեխնիկական և հրդեհային անվտանգության տեսչական մարմնի իրազեկման, խորհրդատվության և հանրության հետ տարվող աշխատանքների բաժնից:
Ստուգման արդյունքում ընկերություններում հայտնաբերվել են հրդեհային անվտանգության կանոնների և նորմատիվ փաստաթղթերի պահանջների մի շարք խախտումները։ Մասնավորապես՝ «Թամարա և Անի» ՍՊ ընկերությունում շինարարական հիմնատարրերը մշակված չեն եղել հրապաշտպան լուծույթով կամ պատվածքով, օբյեկտում կրակմարիչները տեղադրված չեն եղել հրդեհի հնարավոր օջախներից ոչ ավել քան 30 մ հեռավորության վրա, 500 մ3-ից ավելի ծավալով արտադրական շինությունները սարքավորված չեն եղել հրշեջ ծորակներով կահավորված ներքին հակահրդեհային ջրացանցով, ավտոամբարձիչը, վերելակը, 7 հատ կոմպրեսոր և 19 հատ սառնարանային ագրեգատ չեն անցել ամենամյա տեխնիկական անվտանգության փորձաքննություն։
«Բեկոն Պրոդուկտ» ՍՊ ընկերությունում ստուգման արդյունքում հայտնաբերվել է, որ տարահանման ելքի դռները բացվում են դեպի ներս՝ տարահանմանը հակառակ, ինչպես նաև CO-ի և ազոտի կայանը, 2 հատ կոմպրեսորային ճնշակայան և 10 հատ սառնարանային ագրեգատ չեն անցել ամենամյա տեխնիկական անվտանգության փորձաքննություն։
Երկու ընկերություններում էլ շենք-շինությունները սարքավորված չեն եղել հրդեհի ազդանշանման ինքնաշխատ համակարգերով։
Տարածքային բաժնի աշխատակիցների կողմից ընկերությունների տնօրեններին տրվել են հրդեհային անվտանգության պահանջները կատարելու և հայտնաբերված խախտումները սեղմ ժամկետներում վերացնելու վերաբերյալ կարգադրագրեր։
Տրվել է նաև խորհրդատվություն՝ 200 մ2 և ավելի մակերեսով արտադրական կազմակերպությունների համար հրդեհային և տեխնիկական անվտանգության կանոնների պահպանման, հրդեհի ժամանակ մարդկանց անվտանգության ապահովման, տարահանման, հրդեհի դեպքում անձնակազմի և պատասխանատուների գործողությունների վերաբերյալ։
