Վարչապետի աշխատակազմը հանրային քննարկման է ներկայացրել Հարկային օրենսքրքում լրացումներ կատարելու մասին նախագիծը:
Նախատեսվում է, որ մինչև դրոշմավորման ենթակա ապրանքների օտարումն էլեկտրոնային եղանակով կգրանցվեն դրոշմավորման ենթակա ապրանքների տեսակը, ենթատեսակը, տարողությունը, քանակությունը և համապատասխան ակցիզային դրոշմանիշերի և դրոշմապիտակների սերիաներն ու հերթական համարները: ԱՏԳ ԱԱ 3004 ծածկագրին դասվող ապրանքների դեպքում էլեկտրոնային եղանակով կգրանցվեն նաև ներմուծման հավաստագրի համարը և նրանում դեղի հերթական համարը:
Նախագծի հիմանավորման մեջ նշվում է, որ ընդունման արդյունքում Tax Stamp հավելվածով դեղը սկանավորելիս, հնարավոր կլինի ցանկացած դեղի հավաստագրված և անվտանգ լինելը պարզել թե՛ ստուգողի, թե՛ դեղատան, թե՛ սպառողի կողմից ցանկացած վայրում՝ առանց դեղը լրացուցիչ փորձաքննության ուղարկելու, ինչը ամբողջ շուկան հնարավորինս զերծ կպահի չհավաստագրված դեղերի շրջանառությունից։
