ՀՀ առողջապահական և աշխատանքի տեսչական մարմինը իրազեկում է դեղերի ներմուծմամբ զբաղվող կազմակերպություններին․
ՀՀ առողջապահական և աշխատանքի տեսչական մարմինը, հաշվի առնելով անվտանգ, արդյունավետ և որակյալ դեղերի շրջանառության ապահովման անհրաժեշտությունը, ինչպես նաև որակը չստուգված և հնարավոր կեղծ դեղերի ՀՀ տարածք մուտքը կանխելու նպատակով, տեղեկացնում է, որ իր լիազորությունների սահմաններում իրականացնում է վերահսկողական գործառույթներ՝ «Դեղերի մասին» ՀՀ օրենքի 16-րդ հոդվածի 1-ին մասի, 21-րդ հոդվածի 1-ին և 4-րդ մասերի, 23-րդ հոդվածի 2-րդ մասի, ինչպես նաև ՀՀ կառավարության 2000 թվականի սեպտեմբերի 20-ի թիվ 581 որոշմամբ հաստատված ՀՀ դեղերի և դեղանյութերի ներմուծման ու արտահանման կարգի (այսուհետև՝ Կարգ) 5.1-րդ, 34.1-րդ, 34.5-րդ կետերի պահանջների պահպանման նկատմամաբ։
Հաշվի առնելով վերոգրյալը, ՀՀ առողջապահական և աշխատանքի տեսչական մարմինը, հնարավոր վարչական իրավախախտումները նախականխելու նպատակով, դիմում է դեղերի ներմուծմամբ զբաղվող կազմակերպություններին՝ ԵԱՏՄ անդամ երկրներից դեղերի ներմուծման ժամանակ խստորեն պահպանել վերոնշյալ կետերի պահանջները և ԵԱՏՄ անդամ երկրից դեղ ներմուծելիս, համաձայն գործող Կարգի, ՀՀ պետական սահմանը հատելուց հետո 5 աշխատանքային օրվա ընթացքում՝ մինչև դեղի դրոշմապիտակավորումը և իրացումը (այդ թվում անհատ դեղատներին) դիմել ՀՀ առողջապահության նախարարություն` դեղերը փորձաքննության ենթարկելու և համապատասխանության հավաստագիր ստանալու նպատակով։
Տեղեկացնում ենք նաև, որ համապատասխանության հավաստագրի տրամադրումը մերժվելու դեպքում դեղերը չեն կարող իրացվել և (կամ) ենթակա են ոչնչացման կամ արտահանման, իսկ համապատասխանության հավաստագրի տրամադրման մերժման վերաբերյալ ՀՀ առողջապահության նախարարի հրամանն ստանալուց հետո 15 աշխատանքային օրվա ընթացքում դրանց ոչնչացման կամ արտահանման մասին անհրաժեշտ է տեղեկանք ներկայացնել ՀՀ առողջապահության նախարարություն:
