Կառավարությունն այսօր «Սևանի իշխան» ՓԲԸ-ին ներմուծվող սարքավորումների մասով ազատեց մաքսատուրքից, իսկ հարկային մարմինների կողմից հաշվարկված ավելացված արժեքի հարկի գումարների վճարման ժամկետը երեք տարի ժամկետով հետաձգեց։
Նախագիծը ներկայացրեց ՀՀ տնտեսական զարգացման և ներդրումների նախարար Սուրեն Կարայանը՝ հայտնելով, որ ընկերությունը նախատեսում է ներդրումներ իրականացնել շուրջ 682 մլն ՀՀ դրամի չափով, որից սարքավորումների համար նախատեսված գումարը կկազմի մոտ 278 մլն ՀՀ դրամ, կստեղծվի մոտ 23 աշխատատեղ` միջին աշխատավարձը կազմելով 2017թ.– 290 հազ. ՀՀ դրամ, 2018թ.- 290 հազ. ՀՀ դրամ և 2019թ.-290 հազ. ՀՀ դրամ:
Նախատեսվում է ստեղծել ձկան սելեկցիոն տնտեսություն։
Վարչապետ Կարեն Կարապետյանը այս պայմանագիրը գնահատեց որպես «լավ գործարք»։
Նշենք, որ «Սևանի իշխան» ընկերությունը ստեղծվել է ՀՀ գյուղատնտեսության նախարարության «Սևանի իշխանի պաշարների վերականգնման և ձկնաբուծության զարգացման հիմնադրամի» կողմից, այն պետք է իրականացնի Սևանա լճում իշխանի պաշարների վերականգնման և ձկնաբուծության զարգացման համալիր ծրագիրը։
