Վանաձորի հիվանդանոցային համալիրի ծննդօգնության և մանկական բաժանմունքների ծառայությունից օգտվող հիվանդները բողոքում են սպասարկման որակից: Այսօր Կոռուպցիայի բացառումն առողջապահության ոլորտում, և դրան նպաստող անհրաժեշտ քայլերը ծրագրի հետազոտությունների շնորհանդեսին ասաց նախաձեռնության ղեկավար Նարինե Խաչատրյանը:

Նրա փոխանցմամբ` դրամաշնորհի ընթացքում հարցումներ են իրականացվել 300 քաղաքացիների և բուժաշխատողների շրջանում:

Հետազոտություններն անցկացրել են լրագրողների «Սելեն» ակումբ ՀԿ-ն՝ «Լոռու ՄԻԳ» ՍՊԸ -ի հետ համագործակցությամբ:

Ըստ հետազոտության` բուժաշխատողներն այս քայլին դիմում են ցածր աշխատավարձի պատճառով. «Պետություննը շատ բան է անում, որպեսզի բացառի կոռուպցիոն ռիսկերը, իր վրա վերցնելով պարտավորություններ, դրա համար ուսումնասիրությունը սկսեցին այստեղից: Մեր ծրագրերի ընթացքում համագործակցել ենք ԶԼՄ-ների հետ, որ հասարակության ձայնը լսելի լինի»,- ասաց տիկին Խաչատրյանը:

Ըստ տիկին Խաչատրյանի` դժգոհությունները երկուստեք են` բողքում էին քաղաքացիները բուժաշխատողներից, իսկ վերջիններս էլ դժգոհ էին վերաբերմունքից: Ի դեպ, բուժաշխատողներն իրենք էլ են խոստովանել, որ կոռուպցիան ի հայտ է գալիս ցածր աշխատավարձի պատճառով, հարցումների արդյունքում` 100 հոգուց 80-ը խնդիրը դրա մեջ է տեսել:

Նարինե Խաչատրյանը շեշտեց, որ հարցումները ցույց են տվել, որ մարդիկ իրազեկ չեն իրենց իրավունքներին, սա նույնպես լուրջ խնդիր է:

Այս դրամաշնորհը տրամադրվել է «Կոռուպցիայի դեմ պայքարի բազմակողմանի խթանում» ծրագրի շրջանակներում, այն իրականացվում է Հայաստանի երիտասարդ իրավաբանների ասոցիացիայի կողմից՝ գործընկեր՝ Ինֆորմացիայի ազատության կենտրոնի հետ համատեղ՝ Եվրոպական Միության և ԵԱՀԿ ֆինանսական օժանդակությամբ:

Կարեն Զադոյանը` ծրագրի ղեկավարը, ներկայացրեց ՀԵԻԱ-ի գործունեությունը, անդրադարձավ հակակոռուպցիոն պայքարին և խոսեց Հակակոռուպցիոն կոալիցիայի գործունեությունից: Նա նաև ասաց, որ «Կոռուպցիայի դեմ պայքարի բազմակողմանի խթանում» ծրագրի շրջանակներում մարզերի ՀԿ-ներին բազմաթիվ դրամաշնորհներ են տրամադրվել. «Այս ծրագիրը եզակին չէ, մենք բազմաթիվ նախագծերի շուրջ ենք համագործակցել, մենք գտնում ենք, որ պետություն և քաղհասարակության համագործակցությունը, եթե հիմնված է իրական գործընկերության վրա, միշտ արդյունավետ կլինի: Այս հանգամանքն ապացուցում է նաև մեր համագործակցության փորձը»:

Միջոցառմանը ներկա էր նաև Լոռու մարզպետ Արթուր Նալբանդյանը: Նա կարևորեց հետազոտության անցկացումը` նշելով. «Մենք ինքներս էլ շատ դրական և բացասական կարծիքներ լսում ենք, բայց հաճախ դժվար է այդ կարծիքների հետևից գնալ ու բացահայտումներ անել: Այս առումով մենք ողջունեցինք ՀԿ-ի կողմից ներկայացրած նախաձեռնությունը: Ուսումնասիրությունները մեզ հետաքրքրում են, այդ աշխատանքներից հետո մենք ինքներս հետևություն կանենք` մեր հետագա անելիքների վերաբերյալ»,-նշեց պարոն Նալբանդյանը:

Միջոցառման ընթացքում մասնակիցների դիտեցին տեսանյութ, ծանոթացան վեր հանված խնդիրներին և քննարկեցին առաջարկները: Շնորհանդեսին ներկա էին նաև բուժհաստատության ղեկավար կազմն ու բժիշկներ:

Իրավաբան.net