Իրավաբան.net-ը շարունակում է իր ընթերցողներին ծանոթացնել բարձրաստիճան պաշտոնատար անձնաց կողմից էթիկայի հանձնաժողով ներկայացված հայտարարագրերին:
Այս անգամ կանդրադառնանք ՀՀ վերաքննիչ քրեական դատարանի դատավորներին՝ ներկայացնելով նրանցից 7-ի հայտարարագրած եկամուտները:
ՏիգրանՍահակյանը (դատավորէ 2007 թվականից) 2013 թվականի ընթացքում ունեցելէ 14 միլիոն 412 հազար 346 դրամ, որն ամբողջությամբ ձեռք բերել աշխատանքի վարձատրությունից և/կամ դրան հավասարեցված այլ վճարումներից, ինչպես նաև տարվա սկզբին հայտարարագրած 7 միլիոն 300 հազար դրամը աճել է՝ դառնալով 8 միլիոն 700 հազար դրամ: Որպես բարձրաստիճան պաշտոնատար անձի դուստր իր եկամուտներն է հայտարարագրել Անահիտ Սահակյանը և կինը՝ Գոհար Սահակյանը:
Վերջինս հայտարարագրել է 4 միլիոն 250 հազար դրամ, որն ունեցել է հարկային տարվա սկզբին: Նշված գումարից ծախսել է ընդամենը 200 հազար դրամ, քանի որ տարվա ավարտին այս գումարը կազմել է 4 միլիոն 50 հազար դրամ: Ի տարբերություն կնոջ՝ դատավորի դուստրը որևէ դրամական միջոց չի հայտարարագրել:
Մհեր Արղամանյանը (դատավոր է 1999 թվականից) 2013 թվականի ընթացքում ունեցել է 9 միլիոն 55 հազար 961 դրամի եկամուտ՝ որպես աշխատանքի վարձատրությունից և/կամ դրան հավասարեցված այլ վճարումներ: Ինչպես նաև՝ 7 միլիոն դրամ, որը տարվա ավարտին ավելացել է գրեթե 2 միլիոն դրամով՝ 9 միլիոն 200 հազար դրամ:
Դատավորի կինը՝ Նարինե Մկրտչյանը, որևէ եկամուտ չի հայտարարագրել:
Լլիլիթ Թադևոսյանը (դատավոր է 2012 թվականից) 2013 թվականի ընթացքում ունեցել է 26 միլիոն 538 հազար դրամի եկամուտ, որից 20 միլիոն դրամը ստացված փոխառություններն են, իսկ մնացյալը՝ աշխատավարձը և/կամ դրան հավասարեցված այլ վճարումները:
Դատավորը տարվա սկզբին ունեցել է 22 միլիոն 470 հազար դրամ, որը տարվա ավարտին դարձել է 27 միլիոն դրամ:
Վահագն Գրիգորյանը, ով դատավորի ամուսինն է, նույն ժամանակահատվածում նշել է 5 միլիոն 749 հազար 203 դրամի եկամուտ՝ ձեռք բերված որպես աշխատավարձ և/կամ դրան հավասարեցված այլ վճարումներ, ինչպես նաև 34 միլիոն 200 հազար դրամ, որը դարձել տարվա ավարտին 27 միլիոն 300 հազար դրամ:
Արշակ Խաչատրյանը (դատավոր է 1999 թվականից) 2013 թվականի ընթացքում որպես աշխատավարձ և/կամ դրան հավասարեցված այլ վճարումներ հայտարարագրել է 9 միլիոն 166 հազար 811 դրամ:
Բացի այս, դատավորն ընթացիկ տարում ունեցել է 5 միլիոն դրամ, որը տարվա ավարտին 500 հազար դրամով ավելացել ՝ 5 միլիոն 500 հազար դրամ:
Պաշտոնատար անձի կնոջ եկամուտը գոյացել է բացառապես կենսաթոշակից՝ կազմելով՝ 180 հազար դրամ:
Սևակ Համբարձումյանը (դատավոր է 1999 թվականից) 2013 թվականի ընթացքում, որպես աշխատանքի վարձատրություն և/կամ դրան հավասարեցված այլ վճարումներ, ստացել է 8 միլիոն 461 հազար 937 դրամ:
Տարվա սկզբին հայտարարագրած 16 միլիոն 200 հազար դրամից մնացել է ընդամենը 8 միլիոն դրամ, ինչպես նաև 8 միլիոն 400 հազար դրամով դատավորը ձեռք բերել՝ LEXUS ES 350 մակնիշի ավտոմեքենա:
Նրա կինը՝ Վարդիթեր Էքսուզյանը, գույքը օտարելուց ստացել է 3 միլիոն դրամը, որն էլ հայտարարագրված է որպես տարեկան եկամուտ: Սակայն՝ ի՞նչ գույք է օտարվել ներկայացված տվյալներում, չի նշվում
Ժորա Համբարձումյանը՝ Սևակ Համբարձումյանի որդին, ունեցել է ընդամենը 649 հազար դրամի եկամուտ, որն ամբողջությամբ ձեռք է բերել որպես աշխատանքի վարձատրություն և/կամ դրան հավասարեցված այլ վճարումներ:
Գրիշա Մելիք-Սարգսյանը (դատավոր է 1999 թվականից) 2013 թվականի ընթացքում ունեցել է 14 միլիոն 489 հազար 968 դրամի եկամուտ: Նշված գումարից 5 միլիոն 685 հազար դրամը ձեռք է բերել որպես դատավորի կենսաթոշակ, 8 միլիոն 444 հազար 968 դրամը՝ աշխատանքի վարձատրություն և/կամ դրան հավասարեցված այլ վճարումներ, իսկ 360 հազար դրամը՝ այլ եկամուտ:
Բացի նշված եկամուտը, հարկային տարվա սկզբում ունեցել է 5 միլիոն դրամ, որը տարվա ավարտին դարձել է 4 միլիոն դրամ:
Դատավորի կինը՝ Սիլվա Թևոսյանը, աշխատանքի վարձատրություն և/կամ դրան հավասարեցված այլ վճարումների դիմաց հայտարարագրել է 360 հազար դրամ: Տեղեկացնենք նաև, որ տարվա սկզբին ունեցած 70 հազար դրամը դարձել է 150 հազար դրամ:
Հենրիկ Տեր-Ադամյանը (դատավոր է 1999 թվականից) 2013 թվականի ընթացքում հայտարարագրել է 8 միլիոն 453 հազար 979 դրամ՝ աշխատանքի վարձատրություն և/կամ դրան հավասարեցված այլ վճարումներ և 5 միլիոն դրամ, որը հարկային տարվա ավարտին ավելացել է 1 միլիոն դրամով:
Վերջինիս կինը, թեև նշված է որպես փոխկապակցված անձ, բայց որևէ դրամական միջոց չի հայտարարագրել:
Շարունակելի…..
Լուսանկարները՝ court.am-ի
