ՌԴ ԶՈւ-ն Ուկրաինայում հեռահար ճշգրիտ զենքերով ոչնչացրել է հարյուրավոր օտարերկրյա վարձկանների՝ ժամանելուց անմիջապես հետո։ Այս մասին հինգշաբթի օրը հայտարարել է ՌԴ ՊՆ պաշտոնական ներկայացուցիչ, գեներալ-մայոր Իգոր Կոնաշենկովը։ Տեղեկանում ենք ТАСС լրատվական գործակալությունից։
Միաժամանակ վարձկանների մեծ մասը, ըստ ՌԴ ՊՆ պաշտոնական ներկայացուցչի, ոչնչացվել է մարտական գոտում պատրաստվածության ցածր մակարդակի և իրական մարտական փորձի բացակայության պատճառով։
Ինչպես պարզաբանել է Կոնաշենկովը, Ուկրաինայի զինված ուժերի ստորաբաժանումների և Ազգային գվարդիայի հրամանատարները չեն խնայում վարձկաններին՝ սեփական զինվորականների կորուստները նվազեցնելու համար։ «Գերեվարված վարձկանները հարցաքննության ժամանակ ասում են, որ իրենք առաջին հերթին զոհաբերվում են: Կիևի ռեժիմի կողմից կորուստները ճնշելու և աճյունների բացակայության պատճառով վարձկանների հարազատները իրենց բնակության երկրներում պարզապես չգիտեն նրանց մահվան մասին», – ավելացրել է նա։
—————
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
