Ազգային ժողովի «Քաղաքացիական պայմանագիր» խմբակցության պատգամավոր Սերգեյ Բագրատյանի որդին՝ 27-ամյա Շանթ Բագրատյանը, ձերբակալվել է: Այս մասին Iravaban.net-ին հայտնում են Քննչական կոմիտեից:
Նրան մեղադրանք է առաջադրվել Քրեական օրենսգրքի 258 հոդվածի 4-րդ մասի հատկանիշներով (Խուլիգանությունը, որը կատարվել է զենքի կամ որպես զենք օգտագործվող առարկաների գործադրմամբ):
Նշվում է, որ խափանման միջոցի վերաբերյալ որոշում դեռ չի կայացվել։
Հիշեցնենք, որ ավելի վաղ հայտնի էր դարձել, որ ապրիլի 2-ին՝ ժամը 17:30-18:00-ն ընկած ժամանակահատվածում, անհայտ անձինք մուտք են գործել Վայք քաղաքի սկզբնամասում գտնվող «Թամսար» ՍՊԸ-ին պատկանող գազալցակայանի տնօրեն 45-ամյա Վահե Ասատրյանի աշխատասենյակ և առանց որևէ պահանջ ներկայացնելու՝ ծեծել, իսկ նրանցից մեկը ձեռքին եղած մետաղական ձողով հարվածներ էր հասցրել Վ. Ասատրյանին, ապա՝ դիմել փախուստի:
