Իսպանացի անասնաբույժները պարզել են, որ «օմիկրոն» շտամը հաճախ է ներմուծվում տնային կատուների և շների օրգանիզմ նրանց վարակված տերերից, բայց դա ավելի քիչ է տեղի ունենում SARS-CoV-2-ի այլ տարբերակների համեմատ: Հետազոտողների դիտարկումների արդյունքները ներկայացվել են bioRxiv էլեկտրոնային գրադարանի հոդվածում, փոխանցում է ТАСС լրատվական գործակալությունը։
«Մեր դիտարկումները ցույց են տալիս, որ կորոնավիրուսի նոր շտամները կարող են փոխանցվել մարդկանցից կենդանիներին: Սա ևս մեկ անգամ ընդգծում է կենդանիների շրջանում COVID-19-ի տարածման մոնիտորինգի անհրաժեշտությունը»,- գրել են հետազոտողները։
Վերջին երկու տարիների ընթացքում անասնաբույժներն ու կենսաբանները բազմաթիվ օրինակներ են հայտնաբերել, թե ինչպես են SARS-CoV-2 կորոնավիրուսը կամ նմանատիպ պաթոգենները ներթափանցել բազմաթիվ վայրի և ընտանի կենդանիների պոպուլյացիաների մեջ: Մասնավորապես, Միացյալ Նահանգների գիտնականները սպիտակապոչ եղջերուների և վայրի կատուների արյան նմուշներում հայտնաբերել են կորոնավիրուսի դեմ հակամարմիններ, իսկ մինչ այդ գիտնականները հայտնաբերել են ապացույցներ, որ SARS-CoV-2-ը կարող է վարակել ջրաքիսներին, առյուծներին, վագրերին, ջրարջի շներին և շատ այլ վայրի կենդանիների:
Իսպանացի անասնաբույժների մի խումբ՝ Մադրիդի (Իսպանիա) համալսարանի հետազոտող Սանդրա Բարոզո-Արևալոյի գլխավորությամբ, հետաքրքրվել է, թե արդյոք այս առումով տարբերություններ կան «օմիկրոն» տարբերակի և SARS-CoV-2-ի նախորդ շտամների միջև: COVID-19 հարուցիչի այս տարբերակի գենոմում մեծ թվով մուտացիաներ, ինչպես ենթադրում են գիտնականները, կարող են մեծապես ազդել ընտանի կենդանիների օրգանիզմ մտնելու նրա ունակության վրա:
