Ռուսաստանի և Թուրքիայի նախագահներ Վլադիմիր Պուտինը և Ռեջեփ Թայիփ Էրդողանը կիրակի օրը կայացած հեռախոսազրույցի ընթացքում պայմանավորվել են, որ Ռուսաստանի և Ուկրաինայի պատվիրակությունների միջև բանակցությունների հաջորդ փուլը կանցկացվի Ստամբուլում։
«Բանակցությունների ընթացքում քննարկվել են ռուս-ուկրաինական պատերազմի շուրջ իրավիճակը և բանակցային գործընթացը։ Նախագահ Էրդողանը և ՌԴ նախագահ Վլադիմիր Պուտինը պայմանավորվել են Ռուսաստանի և Ուկրաինայի բանակցային պատվիրակությունների հաջորդ հանդիպումը անցկացնել Ստամբուլում»,-հայտնել է Թուրքիայի նախագահի գրասենյակը։
Էրդողանը նաև կիրակի օրը Ռուսաստանի ղեկավարի հետ հեռախոսազրույցի ժամանակ ասել է, որ Անկարան կշարունակի նպաստել Ռուսաստանի և Ուկրաինայի միջև խաղաղության հաստատմանը։
«Նախագահ Էրդողանը ընդգծել է Ռուսաստանի և Ուկրաինայի միջև որքան հնարավոր է շուտ զինադադար և խաղաղություն հաստատելու, ինչպես նաև տարածաշրջանում հումանիտար իրավիճակի բարելավման անհրաժեշտությունը: Նա հավելել է, որ Թուրքիան կշարունակի իր ներդրումն ունենալ այս գործընթացում», – ասել է Թուրքիայի նախագահի գրասենյակը:
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
