«5165» շարժման համահիմնադիր Գևորգ Թամամյանը ֆեյսբուքյան իր էջում գրել է.
«Այսօր ցույց տվեցին ներկա իշխանության մի շարքային մանկլավիկի գրառում, որ հիմա էլ փորձել էր մեր շարժումը կապել Քոչարյանի ու ինչ-որ օլիգարխների հետ: Այդ էն նույն մանկլավիկն էր, որ 2 տարի առաջ ակտիվ տարածում էր, թե բա ես Քոչարյանի քավորն եմ: Էս երկու ամսվա մեջ էլ ում հետ ասես չկապեցին, ուզում եմ հասկանամ հաջորդ անգամ ում հերթն է:
Չեմ էլ ուզում պատասխանել նման էակների գրառումներին, որովհետև նրանք մեկ է չեն հասկանա: Նրանք միշտ սովոր են ինչ-որ մեկինը լինելը, ինչ-որ մեկին ծախվելը, ինչ-որ մեկի ձեռքին նայելը, ու ինչ էլ անես, նմանների համար անհասկանալի է, թե ոնց կարող է մի ուժ լինել, որ իրենց պես չի վաճառվում:
Լրիվ հասկանալի է, որ 5165 շարժման ամեն օր աճող հեղինակությունը հանգիստ չի տալիս, իրենց 2 բևեռներ հռչակածներին՝ թե Նիկոլին, թե Քոչարյանին: Լիովին հասկանալի է, որ 5165 շարժումը խառնել է բոլորի խաղաքարտերը: Չէ որ մարդկանց հետ իրենք էլ են խոսում, չէ որ իրենք էլ գիտեն իրական հարցումների պատասխանները: Այդ է պատճառը, որ, եթե նկատել եք, այսքան ուժերի մեջ, անընդհատ փորձում են հարվածներ հասցնել հենց 5165-ին, որովհետև հենց այստեղ են տեսնում իրենց համար ռեալ վտանգը, ռեալ վտանգը՝ կորցնելու իրենց համար այդքան ցանկալի աթոռը:
Նաև կարճ անդրադառնամ մի հարցի, որ շատ են տալիս, թե իմ ընկերներից ու ծանոթներից, թե անծանոթներից: Ասում են, երբ անցաք խորհրդարան ու կանգնեցիք ընտրության առաջ՝ Նիկոլ, թե Քոչարյան, ինչ ընտրություն եք անելու: Պատասխանեմ: Ո՛Չ ՆԱ, Ո՛Չ ՆԱ: Մեր համար այդ օրակարգը կեղծ է և հատուկ է ներդրված հենց այդ երկու թիմերի կողմից, ցույց տալու, թե իբր իրենք են իրար այլընտրանքը: Այդ պատճառով, եթե ձեզ նման հարց կտան, կխնդրեմ հանգիստ և հանդարտ, առանց թշնամանքի և լարվածության, պատասխանեք այսպես. եթե հարց տվողն այդ հարցով Քոչարյանի քարոզն է անում, նրան հակառակ հարցը տվեք՝ եթե ընտրելու լինեք 5165-ի և Նիկոլի մեջ, ում եք ընտրելու: Իսկ եթե հարց տվողն այդ հարցով Նիկոլի քարոզն է անում, նրան հարցրեք՝ 5165-ի և Քոչարյանի միջև ում կընտրի:
Այն մարդիկ, ովքեր ընտրելու են 5165 շարժմանը պետք է սա հստակ իմանան, և այլ ակնկալիքներ չունենան: Ո՛Չ ՆԱ, Ո՛Չ ՆԱ: Իսկ այն մարդիկ, ովքեր 5165-ին չեն ընտրելու, առավել ևս, իրավունք չունեն այդ «պահանջները» ներկայացնելու, դուք կարող եք գնալ և ընտրել այն ուժերին, որոնց մոտեցումները ձեզ ավելի սրտամոտ են:
Բազմիցս եմ ասել, չեմ զլանա նորից կրկնել՝ իմ համար հստակ է, որ նշված երկու ուժերի հաղթանակի դեպքում էլ Հայաստանին ոչ մի լավ բան չի սպասվում: Երկուսի դեպքում էլ Հայաստանին սպասվում է անընդհատ շարունակվող ցնցումներ, արյուն, բախումներ, հիասթափություններ, անարդարություններ, արտագաղթ, և այս ամենի արդյունքում՝ երկրի կործանում:
Հայաստանը շանս ունի ոտքի կանգնելու, եթե իշխանության գան իրական հայրենասեր, արդար և կոմպետենտ ուժերը:
Հ.Գ. Վերջերս 5165 շարժումը և Զարթոնք կուսակցությունը հայտարարություն էին տարածել, դեմ արտահայտելով ներկա իշխանությունների կողմից Հայաստանի սահմաններին վերաբերվող որևէ փաստաթղթի ստորագրմանը: Նաև կոչ էր արվել քաղաքական դաշտին միանալ այդ հայտարարությանը կամ նմանատիպ հայտարարություն անել: Կարո՞ղ եք ստուգել, թե քանի ուժ նման հայտարարություն արեց… Եզրակացություններն ինքներդ արեք! Նրանց հետաքրքրում է մաքուր, արդեն ամեն ինչ ստորագրած իշխանությունը, երբ հանգիստ կարող ես «փրկիչ» դառնալ»,-գրել է նա:
