ՀՀ ԿԳՄՍՆ-ն e-draft.am հարթակում հանրային քննարկման է ներկայացրել հանրակրթական ուսումնական հաստատություններում գործածվող փաստաթղթերի ցանկը և դրանց լրացման կարգը սահմանող ԿԳՄՍՆ նախարարի հրամանի նախագիծը: Առաջարկվում է գործածվող 14 փաստաթղթերի մեծ մասն այսուհետ վարել էլեկտրոնային եղանակով: Նոր կարգի նպատակն է դյուրացնել հանրակրթական ուսումնական հաստատություններում պարտադիր գործածության փաստաթղթերի լրացումը, գործածումը և փաստաթղթաշրջանառությունը, ինչը նաև կմեծացնի հանրակրթության ուսումնական հաստատությունների թափանցիկությունն ու հաշվետվողականությունը: Դպրոցների կառավարման տեղեկատվական համակարգում գործածվող փաստաթղթերի մի մասը ձևավորվում է ինքնաշխատ եղանակով՝ արդեն մուտքագրված տեղեկությունների հիման վրա:
Հանրակրթական ուսումնական հաստատություններում գործածվող փաստաթղթերի ցանկը ստորև.
- Էլեկտրոնային դասամատյաններ
- Աշխատողի անձնական էլեկտրոնային գործ
- Սովորողի անձնական էլեկտրոնային գործ
- Միջնակարգ կրթության ատեստատների բաշխման մատյան
- Հիմնական կրթության վկայականների բաշխման մատյան
- Ավարտական, պետական ավարտական, փոխադրական, էքստեռն քննությունների և գիտելիքների ստուգման արձանագրություններ
- Էլեկտրոնային հաստիքացուցակ
- Տարիֆիկացիոն մատյան, ոչ պետական ուսումնական հաստատությունների դեպքում` հիմնադրի որոշմամբ
- Ուսումնական հաստատության մանկավարժական խորհրդի նիստի արձանագրություն
- Ուսուցչի բաց թողած և փոխարինած դասաժամերի հաշվառման մատյան
- Ուսումնական առարկաների թեմատիկ պլաններ՝ էլեկտրոնային տարբերակով
- Դասալսումների արդյունքների արձանագրություն
- Տնօրենի տեղակալների, առարկայական մեթոդական միավորումների ղեկավարների, դասղեկների աշխատանքային պլաններ՝ էլեկտրոնային տարբերակով
- Սովորողների շարժի մատյան /ձևավորվում է էլեկտրոնային մատյանում տվյալներ մուտքագրելու արդյունքում/:
Նշենք, որ առաջարկվում է ուժը կորցրած ճանաչել ՀՀ կրթության և գիտության նախարարի 2011 թվականի հունվարի 18-ի «Հայաստանի Հանրապետության հանրակրթական ուսումնական հաստատություններում գործածության ենթակա փաստաթղթերի անվանացանկը հաստատելու» N 23-Ն հրամանը:
Մանրամասները՝ տեսանյութում
