Արդարադատության նախարարությունը հանրային քննարկման է ներկայացրել «Հայաստանի Հանրապետության քաղաքացիության մասին» օրենքում փոփոխություններ և լրացումներ կատարելու մասին» օրենքի նախագիծը:
Նախատեսվում է, որ ՀՀ քաղաքացիություն կարող է ստանալ ՀՀ քաղաքացիություն չունեցող այն անձը` որը մինչև ՀՀ քաղաքացիություն ստանալու դիմումը ներկայացնելու պահը վերջին երկու տարվա ընթացքում օրենքով սահմանված կարգով գրանցված ամուսնության մեջ է գտնվել ՀՀ քաղաքացու hետ և այդ երկու տարվա ընթացքում առնվազն 365 օր օրինական հիմքերի առկայությամբ բնակվել է ՀՀ կամ ունի ՀՀ քաղաքացի երեխա (զավակ):
Երդման արարողությանը մասնակցելու, ինչպես նաև ՀՀ քաղաքացու անձնագիր ստանալու համար ՀՀ քաղաքացիություն ստացած անձը Հայաստանում գտնվելու դեպքում պետք է ներկայանա ՀՀ ոստիկանություն, իսկ օտարերկրյա պետությունում գտնվելու դեպքում՝ ՀՀ համապատասխան դեսպանություն կամ հյուպատոսական հիմնարկ:
Երեխան կկորցնի ՀՀ քաղաքացիությունը` քաղաքացիության դադարեցման հետևանքով` ծնողի ներկայացրած դիմումի հիման վրա, այսուհետ 14-18 տարեկան երեխայի դեպքում կներկայացվի նաև երեխայի գրավոր համաձայնությունը՝ օրենքով ՀՀ քաղաքացիությունը դադարեցնելու համար նախատեսված ընդհանուր հիմունքներով::
ՀՀ քաղաքացիությունից դուրս գալու մասին քաղաքացու դիմումը կմերժվի, եթե ունի «Պաշտպանության մասին» օրենքով նախատեսված՝ պետության հանդեպ չկատարված պարտավորություններ՝ մասնավորապես,
ա) տվյալ տարվա ընթացքում լրանում է արական սեռի քաղաքացու 16 տարին և վերջինս պետք է կատարի զինվորական հաշվառման կանգնելու իր պարտականությունը.
բ) ունենալով զինվորական հաշվառում չի զորակոչվել պարտադիր զինվորական ծառայության կամ չի հաշվառվել զինված ուժերի պահեստազորում.
գ) հաշվառված է զինված ուժերի պահեստազորում, սակայն ունի օրենքով սահմանված բժշկական վերափորձաքննություն անցնելու պարտականություն.
դ) քաղաքացիության դադարեցման մասին դիմումի քննարկման ժամանակահատվածում ընդգրկված է կազմակերպվող վարժական հավաքներին կամ զինվորական վարժանքներին.
ե) դիմումի քննարկման ժամանակահատվածում հայտարարվել կամ գործում է ռազմական դրության իրավական ռեժիմ:
Քաղաքացիության հարցերի վերաբերյալ դիմումները կքննարկեն վեցամսյա ժամկետում, այսուհետ, բացառությամբ ազգությամբ հայերի կողմից ՀՀ քաղաքացիություն ստանալու դիմումների, որոնք կքննարկվեն եռամսյա ժամկետում:
