«Զվարթնոց» միջազգային օդանավակայանից ինքնաթիռ է մեկնել Իսրայելի Թել Ավիվ քաղաքից ՀՀ քաղաքացիներ Երևան տեղափոխելու համար։
ԱԳՆ-ն իր ֆեյսբուքյան էջում մանրամասներ է ներկայացրել չվերթից: Մասնավորապես ասվում է.
«Ճվերթում ներառված անձանց ցանկը կազմվել է Իսրայելում ՀՀ դեսպանություն և ՀՀ ԱԳՆ ներկայացված դիմումների հիման վրա՝ ըստ դիմելու ժամանակագրության, երեխաների առկայության և ընտանիքին չբաժանելու սկզբունքով:
ՀՀ արտաքին գործերի նախարարությունը, այդ թվում՝ Իսրայելում ՀՀ դեսպանության միջոցով, հետևում է իրավիճակի զարգացումներին և ըստ անհրաժեշտության կձեռնարկի լրացուցիչ քայլեր։
Նաև հայտնում ենք, որ այս պահի դրությամբ ռազմական գործողությունների հետևանքով տուժածների շրջանում ՀՀ քաղաքացիների և հայերի առկայության վերաբերյալ տվյալներ չկան»։
Հիշեցնենք, որ հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման է ենթարկվել։
ՀՀ ԱԳՆ–ն վստահեցրել է` Իսրայելում ռազմական գործողությունների հետևանքով տուժածների շրջանում հայեր կամ ՀՀ քաղաքացիներ չկան, Երուսաղեմի հայկական եկեղեցին նույնպես չի տուժել։ Այս ընթացքում երկրում Հայաստան վերադառնալ ցանկացող ՀՀ քաղաքացիների կամավոր գրանցում է իրականացվել։
