Այսօր, Ուկրաինայի անկախության օրվա կապակցությամբ եւ ի նշան համերաշխության ռուսաստանյան ագրեսիայի դեմ հերոսաբար մարտնչող Ուկրաինայի ժողովրդի հետ, մի խումբ հայաստանյան հասարակական ու քաղաքական գործիչներ եւ փորձագետներ այցելեցին Հայաստանի Հանրապետությունում Ուկրաինայի դեսպանատուն։ Նրանց թվում էին նորանկախ Հայաստանի առաջին խորհրդարանի պատգամավոր, խորհրդային շրջանի այլախոհ, ուկրաինացի այլախոհներ Յուրիյ Շուխեվիչի, Վասիլ Ստուսի, Վյաչեսլավ Չեռնովիլի եւ այլոց պայքարակից եւ խցակից Ազատ Արշակյանը, հայտնի իրավապաշտպան Արթուր Սաքունցը, Եվրոպական կուսակցության նախագահ Տիգրան Խզմալյանը, Հանուն Հանրապետություն կուսակցության փոխնախագահ Ռուբեն Մեհրաբյանը եւ վարչության անդամ Առնոլդ Բլեյանը, հրապարակախոս Արմեն Հովհաննիսյանը, Քաղաքականության հետազոտական կենտրոնի նախագահ Արմեն Գրիգորյանը եւ Արեւելայն գործընկերության քաղաքացիական հասարակության ֆորումի Հայաստանի ազգային համակարգող Հովսեփ Խուրշուդյանը:

Ի դեմ Հայաստանում Ուկրաինայի գործերի ժամանակավոր հավատարմատար Վիկտոր Գոնչարի, ռազմական կցորդ Իգոր Ժադանի, դեսպանատան դիվանագետների՝ նրանք շնորհավորեցին Ուկրաինայի ժողովրդին Ուկրաինայի Անկախության օրվա առթիվ: Նրանք նաեւ իրենց խորին ցավակցությունը հայտնեցին Հայաստանի Հանրապետությունում Ուկրաինայի գործերի ժամանակավոր հավատարմատար Ալեքսանդր Սենչենկոյի՝ վերջերս դժբախտ պատահարի հետեւանքով կյանքից հեռանալու կապակցությամբ:

Հայաստանցի հյուրերը հետաքրքրվեցին պատերազմում տիրող իրավիճակի մասին։ Ուկրաինացի դիվանագետները ներկայացրեցին ռուսական ագրեսիայի հետեւանքով առաջացած ծանր հումանիտար իրավիճակը, նաեւ Ուկրաինայի զինված ուժերի հաջողությւոնները՝ իրենց հայրենիքի ազատագրման գործում:

Քննարկվեցին Հայաստանի և Ուկրաինայի միջև հարաբերությունների զարգացման հեռանկարները, հնարավոր համագործակցության ոլորտները, այդ թվում՝ քաղաքացիական հասարակությունների միջեւ։