Այսօր ՀՀ Փաստաբանների պալատի նախագահի թեկնածու Արա Զոհրաբյանը հանդիպեց Արագածոտնի մարզի փաստաբանների հետ:
Թեկնածուն նախ ողջունեց հանդիպման մասնակիցներին, ապա ներկայացրեց իր նախընտրական ծրագրի հիմնական դրույթները:
Անդրադարձավ պալատի գործունեության թափանցիկությանը՝ մասնավորապես նշեց, որ պալատի կայքէջում հնարավոր կլինի օնլայն տարբերակով հետևել պալատի խորհրդի նիստերին: Ըստ թեկնածուի՝ նման քայլը հանարավորություն կտա առավել իրազեկված լինել պալատի գործունեության մասին:
Նրա խոսքերով՝ պալատի ֆինանսական հոսքերն առավել թափանցիկ դարձնելու համար յուրաքանչյուր եռամսյակը մեկ կհրապարակվի ֆինանսական հաշվետվություն:
Արա Զոհրաբյանն անդրադարձավ նաև փաստաբանների գործուղումների հետ կապված խնդիրներին, մասնավորապես խոսեց գործուղումներին մարզերից փաստաբաններ ընդգրկելու անհրաժեշտության մասին. «Իմ ընտրվելու դեպքում հեռավոր մարզերի փաստաբանների համար կմշակվի օնլայն տարբերակով վերապատրաստում անցնելու հնարավորություն: Մարզերում հնարավոր կլինի ստեղծել համակարգողի ինստիտուտ, որն ավելի համակարգված և արդյունավետ կդարձնի պալատի հետ կապը»:
Հանդպիման ընթացքում հնչեցին նաև մի շարք հարցեր, որոնց թեկնածուն տվեց սպառիչ պատասխաններ:
Հանրային թղթակից՝ Մուշեղ Աբգարյան
