Ուկրաինայում հատուկ գործողության դինամիկան դրական է, ամեն ինչ զարգանում է պաշտպանության նախարարության և գլխավոր շտաբի պլանի շրջանակներում, ասել է ՌԴ նախագահ Վլադիմիր Պուտինը «Մոսկվա. Կրեմլ. Պուտին» ծրագրում լրագրող Պավել Զարուբինին տված հարցազրույցում։
«Ամեն ինչ զարգանում է պաշտպանության նախարարության և գլխավոր շտաբի պլանի շրջանակներում, և ես հուսով եմ, որ մեր զինվորները մեկ անգամ չէ, որ մեզ կուրախացնեն մարտական աշխատանքի արդյունքներով», – ասել է Ռուսաստանի ղեկավարը։
Հունվարի 15-ին ավելի վաղ պաշտպանության նախարարությունը հայտնել էր, որ ռուսական զորքերը հունվարի 14-ին հրթիռային հարձակում են իրականացնել Ուկրաինայի ռազմական հրամանատարության, կառավարման համակարգի և հարակից էներգետիկ օբյեկտների վրա։ Ինչպես ընդգծել են նախարարությունում, բոլոր նշանակված օբյեկտները խոցվել են, և նպատակներն իրականացվել են։
Այս շաբաթ Ռուսաստանի պաշտպանության նախարարությունը հայտարարել էր նաև Սոլեդարի ազատագրման գործողության ավարտի մասին։
Հիշեցնենք, որ ռուս-ուկրաինական պատերազմը կամ «հատուկ գործողությունը» սկսել է 2022 թվականի փետրվարի 24-ին։
Մոսկվայի ժամանակով մոտավորապես ժամը 05:30-ին Ռուսաստանի նախագահ Վլադիմիր Պուտինը հայտարարեց Ուկրաինայի «ապառազմականացման և դենացիֆիկացման հատուկ գործողության» մասին, որից րոպեներ անց հրթիռային հարվածներ սկսվեցին Ուկրաինայի տարբեր հատվածներում, այդ թվում՝ մայրաքաղաք Կիևի մերձակայքում։
Միևնույն ժամանակ, Դոնեցկի (ԴԺՀ) և Լուգանսկի (ԼԺՀ) ինքնահռչակ հանրապետությունների զինված կազմավորումները սկսեցին ռազմական գործողություններ Ուկրաինայի Զինված ուժերի դեմ Դոնբասի ամբողջ ճակատային գծի երկայնքով և մի շարք վայրերում անցան հարձակման։
