Ուկրաինայի նախագահի գրասենյակի ղեկավարի խորհրդական և փաստացի իշխանության պաշտոնական խոսնակ Ալեքսեյ Արեստովիչն նշել է, որ Վրաստանի նախկին նախագահ Միխեիլ Սաակաշվիլին «կամաց-կամաց մահանում է», հայտնում է Грузия Online-ը։
«Եթե բանտում մահանա, բոլորը կասեն, որ սպանել են։ Սա կդառնա ներքաղաքական պայքարի ամենակարևոր գործոնը՝ ընդհուպ մինչև սադրանքներ, անկարգություններ, հեղափոխություններ և այլն»,- կարծում է Արեստովիչը։
Ուկրաինացի քաղաքական գործիչը համոզված է, որ վրացական իշխանությունները, չթողնելով Սահակաշվիլիին բուժման մեկնել արտերկիր, վախենում են Մոսկվայից։
«Հարց է առաջանում՝ ումի՞ց են այդքան վախենում։ Պատասխանը շատ պարզ է՝ նրանից, ումից Հայաստանը շուտով կդադարի վախենալ (կամ արդեն դադարել է վախենալ)»,- ասել է նա՝ ակնարկելով Ռուսաստանին։
Արեստովիչն ասում է, որ չնայած Վրաստանի տարածքները օկուպացված են, Ռուսաստանը «անհաշվելի անախորժություններ» է բերել երկրին, Վրաստանն այժմ «բացարձակ ռուսամետ կուրս» է վարում։
