Թուրքիան պատրաստ է աջակցել ՄԱԿ-ի, Ռուսաստանի և Ուկրաինայի շփման խմբի աշխատանքին։ Այս մասին շաբաթ օրը հայտարարել է Թուրքիայի նախագահ Ռեջեփ Թայիփ Էրդողանը ՄԱԿ-ի գլխավոր քարտուղար Անտոնիո Գուտերեշի հետ հեռախոսազրույցի ժամանակ։ Տեղեկանում ենք ТАСС լրատվական գործակալությունից։
«ՄԱԿ-ի գլխավոր քարտուղար Գուտերեշը նախագահ Էրդողանին տեղեկացրել է Մոսկվայում և Կիևում իր շփումների մասին: Նախագահ Էրդողանն ասել է, որ Թուրքիան պատրաստ է առավելագույն աջակցություն ցուցաբերել ՄԱԿ-ի գլխավորած կոնտակտային խմբին ինչպես մարդասիրական օգնության, այնպես էլ տարհանման հարցերում»,- լրագրողներին հայտնել են Թուրքիայի նախագահի գրասենյակից։
Բացի այդ, Էրդողանն ասել է, որ Թուրքիան «վճռականությամբ և անկեղծությամբ կշարունակի իր ջանքերը՝ այս ճգնաժամը հաղթահարելու և խաղաղություն հաստատելու համար»։
——–
Հիշեցնենք՝ Ուկրաինայի նախագահ Վլադիմիր Զելենսկին մարտի 1-ին հայտարարել էր Վրաստանից դեսպան Իգոր Դոլգովին խորհրդակցության նպատակով հետ կանչելու մասին՝ վկայակոչելով վրացական կողմի «կամավորներին ազատ չարձակելը և պատժամիջոցների վերաբերյալ դիրքորոշումը»։
Երկու շաբաթ անց Վրաստանի նախագահ Սալոմե Զուրաբիշվիլին կոչ արեց իր գործընկերոջը վերանայել որոշումը և Ուկրաինայի դեսպանին վերադարձնել Թբիլիսի։ Չնայած դրան, մարտի 31-ին Զելենսկին հայտարարեց դիվանագետին Վրաստանից հետ կանչելու պաշտոնական հրամանագրի ստորագրման մասին։
