Վեդի համայնքի ղեկավարի ժամանակավոր պաշտոնակատար Գարիկ Սարգսյանը հայտարարություն է տարածել.
«Հաղթեց վեդեցին, հաղթեց մեր իմաստուն ժողովուրդը…
Ձեր կողմից տրված ամեն մի քվեն շատ կարևոր և պարտավորեցնող է, ուստի «Քաղաքացիական պայմանագիր» կուսակցության մեր ավագանու թիմով անելու ենք առավելագույնը` ձեր բոլոր սպասումներն արդարացնելու համար։
Այսօրվանից միասին լծվում ենք մեր համայնքի շենացման պատասխանատու և պատվաբեր աշխատանքին։
Այժմ, առավել քան երբևէ, կարիք ունենք միասնական լինելու, քանի որ միայն միասնականության և փոխադարձ հարգանքի մթնոլորտում կարող ենք հասնել մեր առջև դրված նպատակներին։
Բոլորիդ մաղթում եմ ողջախոհություն և ամենայն բարիք։
Աստված պահապան մեր երկրին, մեր զինվորին և մեզ բոլորիս»։
Հիշեցնենք, որ Վեդի խոշորացված համայնքում երեկ՝ մարտի 27-ին, ՏԻՄ ընտրություններ են: Վեդի համայնքի ընտրություններին մասնակցել են երկու ուժ՝ իշխող «Քաղաքացիական պայմանագիր» եւ «Իմ հզոր համայնք» կուսակցությունները։
Ընտրություններին մասնակցել է քվեարկելու իրավունք ունեցող 37 հազար 15 քաղաքացիներից 23 հազար 378-ը կամ 63,16%-ը։ Այս մասին տեղեկանում ենք ՀՀ կենտրոնական ընտրական հանձնաժողովիից:
