«Հետհայացք գցելով՝ կարծում եմ, որ մեր որոշումը՝ մասնակցել Արտաքին գործերի նախարարների մակարդակով՝ մասնակցել Անթալյայի դիվանագիտական ֆորումին ճիշտ որոշում էր: Ուզում եմ ասել, որ մենք վստահ ենք, որ Հայաստանը և Թուրքիան կարող են և արժի, որ նորմալացնեն, կարգավորեն հարաբերությունները և բացեն սահմանները: Այս գործընթացի մեջ երկու նախարարների հանդիպումը ևս իր դրական ազդեցությունն ունեցավ: Անշուշտ, շոշափելի, կոնկրետ պայմանավորվածություն ձեռք չբերվեց, բայց երկու կողմերս էլ ևս մեկ անգամ վերահաստատեցինք, որ շարունակում ենք երկխոսությունը, շարունակում ենք գործընթացը՝ առանց նախապայմանների նպատակ ունենալով բացել սահմանները»,-այս մասին այսօր՝ մարտի 23-ին, Ազգային ժողովում Կառավարության հետ հարց ու պատասխանի ժամանակ ասաց Արտաքին գործերի նախարար Արարատ Միրզոյանը՝ անդրադառնալով Թուրքիայի հետ հարաբերությունների կարգավորմանը և իր ու Մևլութ Չավուշօղլուի հանդիպմանը:
Նրա խոսքով՝ իրենք քննարկել են նաև ընթացիկ խնդիրներ՝ կապված սահմանների հետ բացմանը. «Տեսնենք, առաջիկայում, եթե շոշափելի արդյունքներ լինեն ևս մեկ անգամ կանդրադառնանք»:
Անդրադառնալով այն փաստին, որ հանդիպմանը Թուրքիայի արտգործնախարարը ներկայացել էր առանց փողկապի, Արարատ Միրզոյանն ասաց, որ ի սկզբանե հայտարարված է եղել առանց փողկապների հանդիպում:
«Ինչ վերաբերում է իմ ժպիտին, ասեմ՝ եթե ես իմանամ, որ իմ ժպիտը ապագայում կարող է գեթ մեկ հայ զինվորի կյանք փրկել, ես էլի կժպտամ, էլի կժպտամ ու էլի կժպտամ»,-ասաց նա:
