Առաջիկա օրերին Արտաքին գործերի նախարար կնշանակվի: Այս մասին խորհրդարանում հայտարարեց «Քաղաքացիական պայմանագիր» խմբակցության պատգամավոր, ԱԺ արտաքին հարաբերությունների մշտական հանձնաժողովի նախագահի թեկնածու Էդուարդ Աղաջանյանը:
Անդրադառնալով դեսպանների վերջին նշանակումներին, որոնք հարցեր են առաջացնում հասարակության մեջ, պատգամավորը խոստովանեց, որ այդ նշանակումները կապված են նաև արտաքին քաղաքական ոլորտում քաղաքական նպատակահարմարության հետ:
Հիշեցնենք, որ Հայաստանի արտգործնախարարի պաշտոնը թափուր է 2021 թվականի մայիսի վերջից, երբ հրաժարական տվեց Արա Այվազյանը: Հեռանալուց առաջ վերջինս հայտարարել էր․ «Խուսափելու համար կասկածներից, որ այս նախարարությունը կարող է ինչ-որ քայլ ձեռնարկել կամ հավանություն տալ գաղափարների, նախաձեռնությունների, որոնք ուղղված են մեր պետականության, մեր ազգային եւ պետական շահերի դեմ»։
Ներկայումս արտգործնախարարի պաշտոնակատարի պարտականությունները կատարում է փոխարտգործնախարար Արմեն Գրիգորյանը:
