Գերիների հետ վերադարձը, ցավոք, կրկին հետաձգվում է, քանի որ հակառակորդի կողմից նոյեմբերի 9-ի եռակողմ հայտարարության 8-րդ կետը ի կատար չի ածվում, ինչը հետպատերազմական մարդասիրական գործընթացի կոպիտ խախտում է։
«Արմենպրես»-ին այս մասին հայտնել են ՀՀ փոխվարչապետ Տիգրան Ավինյանի գրասենյակից։
«Բանակցությունները ռուսական կողմի միջնորդությամբ շարունակվում են, եւ հույս ունենք, որ ադրբեջանական կողմը ի վերջո կհարգի ստորագրված հայտարարությունը ու կյանքի կկոչի հումանիտար պայմանավորվածությունը՝ այդպիսով նպաստելով տարածաշրջանում կայունության հաստատմանը»,- ասված է մեկնաբանության մեջ։
Ինչպես արդեն հայտնել էինք, քիչ առաջ մամուլում տեղեկություն է տարածվել, որ Բաքվից գերիների խումբ է վերադառնում Հայաստան։ Այս պահին ծնողներ ու որոշ քաղաքացիներ են հավաքվել Էրեբունի օդանավակայանի մոտ։
Ինքնաթիռը ժամանեց, բայց՝ դատարկ։
Նշենք, որ ՀՀ վարչապետի մամուլի խոսնակը չի պատասխանում հեռախոսազանգերին։
ՀՀ պաշտպանության նախարարությունից Իրավաբան․net-ին հայտնեցին, որ այդ մասին տեղյակ չեն և ասացին, որ ճշտենք փոխվարչապետի գրասենյակից։
Մենք կապ հաստատեցինք ՀՀ փոխվարչապետ Տիգրան Ավինյանի հետ, ով ասաց, որ սխալ մարդու ենք զանգել, և ինքը այս մասին որևէ մեկնաբանություն չունի տալու։
