Թրամփի շտաբը ​​հայց է ներկայացրել Միչիգանում ձայների հաշվարկը կասեցնելու պահանջով։ Այս մասին հայտնում է «ՏԱՍՍ»-ը։

Ավելի վաղ հայտնել էինք, որ Միչիգան նահանգում նախագահի դեմոկրատ թեկնածու Ջո Բայդենը հավաքել է ձայների 49,4% -ը և առաջ անցել Թրամփից։

Քվեաթերթիկների 94%-ը մշակելու արդյունքում Դոնալդ Թրամփը ստացել է ձայների 49.0%-ը: Այսպիսով, դեմոկրատների թեկնածուն այս նահանգում գերազանցում է գործող պետության ղեկավարին, չնայած մի քանի ժամ առաջ Թրամփը առաջատար էր 49,4% -ով:

Միչիգանում հաղթելը կարևոր է, քանի որ այն թեկնածուին կբերի 16 ընտրական ձայն:

Հիշեցնենք, որ նոյեմբերի 3-ին ԱՄՆ-ում կայացել են նախագահի ընտրություններ, որոնցում երկրի գործող նախագահ Դոնալդ Թրամփի մրցակիցը դեմոկրատական կուսակցության ներկայացուցիչ, երկրի նախկին փոխնախագահ Ջո Բայդենն է:

Քվեարկության արդյունքները դեռ չեն ամփոփվել, սակայն ավելի վաղ գործող նախագահ Դոնալդ Թրամփը խոստացել էր հանդես գալ հայտարարությամբ և հայտարարել ընտրություններում հաղթանակի մասին: Բացի այդ, գործող նախագահն ասել էր, որ ինքն արդեն հաղթել է: Թրամփը նաև նշել էր, որ դեմոկրատները փորձում են «գողանալ իր հաղթանակը»։