Ադրբեջանի նախագահ Իլհամ Ալիևը երկուշաբթի օրը թուրքական պետական հեռուստատեսությանը տված հարցազրույցում ասել է, որ Թուրքիան հնարավոր ապագա հրադադարից հետո պետք է ներգրավվի Լեռնային Ղարաբաղի տարածաշրջանի խաղաղ գործընթացում:
«Թուրքիան պետք է անպայման մասնակցի առաջիկա խաղաղ գործընթացին: Խաղաղ գործընթացը իհարկե սկսվելու է: Բախումները չեն կարող հավերժ շարունակվել, ուստի որքան շուտ, այնքան լավ», – ասել է Ալիևը TRT Haber-ի եթերում:
«Թուրքիան … մեծ համաշխարհային ներուժ է … և Հարավային Կովկասի համար հարևան», – ասել է նա՝ ավելացնելով, որ Անկարայի դիրքորոշումը «նախազգուշացում» է մյուսների համար:
Ալիևը նշել է, որ հրադադարը հնարավոր կլինի միայն այն դեպքում, եթե Ադրբեջանը միջազգային երաշխիքներ ստանա և Հայաստանից «կոնկրետ ժամանակացույց» իր զորքերը դուրս բերելու վերաբերյալ․ «Մենք այլ երկրի հողերի վրա աչք չունենք, բայց այն, ինչ մերն է, պետք է մերը լինի», – ասել է նա:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 4-ի դրությամբ Արցախի զինուժը խոցել է հակառակորդի՝ 14 ուղղաթիռ, 17 ինքնաթիռ, 124 անօդաչու թռչող սարք, 368 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 3154 զոհ, ավելի քան 5270 վիրավոր։ Հայկական կողմից, նախնական տվյալներով, կա 230 զոհ։
Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում վիրավորվել է 80 քաղաքացիական անձ, զոհվել՝ 19 մարդ, վնասվել՝ մոտ 2700 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։
