Երևան քաղաքի Ավան և Նոր Նորք վարչական շրջանների ընդհանուր իրավասության դատարանի վարույթում է գտնվում քրեական գործն ըստ մեղադրանքի Գագիկ Հ.-ի, ում մեղադրանք է առաջադրվել այն բանի համար, որ նա առանց իրացնելու նպատակի 2012թ. հոկտեմբերի վերջին Երևան քաղաքի 3-րդ գյուղի գերեզմանատանը հարակից չգործող կաթսայատան մոտից քաղելու եղանակով ապօրինի ձեռք է բերել և իր մոտ պահել զգալի չափի` 3.76 գրամ, հաստատուն քաշով չորացված մարիխուանա տեսակի թմրամիջոց:
Վերջինս Տ.Նիկողոսյանին պատկանող ավտոմեքենայում գտնվելու ժամանակ տեսնել է իրենց մոտեցող ոստիկանության ծառայողական ավտոմեքենան և մարիխուանա տեսակի թմրանյութը փոխանցել է նույն ավտոմեքենայի սրահում գտնվող Վ.Վարդանյանին`խնդրելով այն դեն նետել պատուհանից, ինչը Վ.Վարդանյանը կատարել է:
Գործողությունը նկատվել է ոստիկանության աշխատակիցների կողմից, որոնք գետնից վերցրել են նշված փաթեթը և Գագիկ Հ.-ին, Վ.Վարդանյանին ու Տ.Նիկողոսյանին բերման ենթարկել ոստիկանության Նոր Նորքի բաժնի Ավանի բաժանմունք:
Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Աղբյուր՝ Իրավաբան.net
