Նկատի ունենալով հանրային հետաքրքրությունը, ինչպես նաև տարակարծությունից խուսափելու նպատակով, զինվորական դատախազությունը պարզաբանում է հետևյալը.

ՀՀ զինվորական դատախազի կողմից 17.01.2013թ. հրավիրած մամլո ասուլիսի ընթացքում հրապարակվել են 2012 թվականի ընթացքում զինված ուժերում արձանագրված զինվորական ծառայություն անցնելու հետ կապված մահվան ելքով դեպքերի թիվը, որը 29-ն է: Դրանում ներառված չեն մահվան ելքով այն դեպքերը, որոնք կապված չեն զինվորական ծառայություն անցնելու հետ կամ դեպքերը, որոնց մեջ հանցագործության հատկանիշներ չպարունակող իրադարձություններ են:

Օրինակ, զորամասից դուրս գտնվող և ծառայողական պարտականությունների հետ չկապված խնդիրներով զինծառայողը անձնական օգտագործման ավտոմեքենայով ավտովթարի է ենթարկվել և արդյունքում մահացել: Կամ արձանագրվել են դեպքեր, երբ զինվորական ծառայության հետ չկապված քաղաքացիական անձանց կողմից կատարված հանցագործության զոհ է դարձել զինծառայողը կամ զինծառայողը մահացել է օձի խայթոցի կամ այլ դժբախտ պատահարի հետևանքով:

Մեկ անգամ ևս փաստենք, որ հանցավորության վիճակը բնութագրվում է ոչ թե հանցագործության հատկանիշներ չպարունակող իրադարձությունների, դժբախտ պատահարների կամ հանցագործության արդյունքում մահացած անձանց թվով, այլ` հանցագործության դեպքի փաստով և քանակով: Հետևաբար, որոշ հասարակական կազմակերպությունների կողմից ներկայացված և մամուլում հրապարակված 2012թ ընթացքում մահացած զինծառայողների թիվը որևէ առնչություն չունի ՀՀ Զինված ուժերում կատարված հանցագործությունների արդյունքում մահացած զինծառայողների թվի հետ:
Տեղեկացնում են ՀՀ դատախազությունից: 

Աղբյուրը` Իրավաբան.net