Առաջին հայացքից աննշան կազմակերպչական լուծում, բայց սա խոսում է վարչապետի պրակտիկ ու արդյունավետ մոտեցման մասին։ Անդրադառնալով այն հանգամանքին, որ կառավարության անդամները, վարչապետ Կարեն Կարապետյանի նոր նախաձեռնությամբ, այլևս ամբիոնից ելույթ չեն ունենում, իր ֆեյսբուքյան հաշվում գրել է Արդարադատության նախկին նախարար Հովհաննես Մանուկյանը՝ հավելելով.
«Ձևականություններին շատ տուրք տալը գործադիրի արդյունավետությունը գցում է կտրուկ։ Պրոտոկոլի դերը ավանդաբար և գործառույթի էության տրամաբանությունից ելնելով պետք է ավելի մեծ լինի օրենսդիր և դատական իշխանություններում։ Եվս մեկ խնդիր կարծում եմ իր լուծումը պետք է գտնի առաջիկայում։ Դա կառավարության նիստերի ուղիղ հեռարձակումն է։ Ըստ իս, սա էականորեն ազդում է կաբինետի քննարկումների որակի վրա, կաշկանդում կաբինետի անդամներին և արդյունքում դարձնում այդ քննարկումները ձևական։ Կառավարության նիստերը պետք է լինեն քաղաքական գաղափարների գեներացման հիմնական հարթակը, իսկ սա պահանջում է անկաշկանդ քննարկում և բանավեճ, այլ ոչ արարողակարգային զեկույց և հատուկենտ հարցեր։ Սա որևէ կերպ չի առնչվում լրատվամիջոցների գործունեության ազատությանը, մարդկանց իրազեկ լինելու հնարավորության և առավել ևս որևէ սահմանադրականը իրավունքի կամ ազատության սահմանափակում չի ենթադրում»։
