Ողջունելով հյուրերին, ՀՀ գլխավոր դատախազ Ա. Դավթյանը, կարևորելով երկու երկրների իրավապահ համակարգերի, մասնավորապես, դատախազությունների միջև երկարամյա և լավ ավանդույթներ ունեցող հարաբերությունները, ընդգծել է, որ ՌԴ գլխավոր դատախազությունը եղել և մնում է ՀՀ գլխավոր դատախազության հուսալի գործընկերը անդրազգային հանցավորության դեմ պայքարի գործում:
Արթուր Դավթյանը նշել է, որ երկար տարիների սերտ համագործակցության արդյունքում երկու երկրների դատախազությունների միջև արդեն իսկ կնքվել է համագործակցության մասին 4 համաձայնագիր, որոնց շնորհիվ առավել հստակեցվել են գործակցության ուղղություններն ու նպատակները և առավել տեսանելի են դարձել արդյունքները: Անդրադառնալով հետագա անելիքներին, ՀՀ գլխավոր դատախազն ընդգծել է, որ համատեղ ծրագրերը բավական հավակնոտ են և դրանց իրականացումը կնպաստի երկու երկրների դատախազական համակարգերի միջև համագործակցության կատարելագործմանը:
ՌԴ գլխավոր դատախազության պատվիրակության ղեկավարը ՌԴ գլխավոր դատախազ Յուրի Չայկայի անունից ՀՀ գլխավոր դատախազ Արթուր Դավթյանին է փոխանցել շնորհավորական ուղերձը: ՌԴ գլխավոր դատախազն իր և ՌԴ դատախազության անունից շնորհավորել է Արթուր Դավթյանին՝ ՀՀ գլխավոր դատախազի բարձր և պատասխանատու պաշտոնը ստանձնելու կապակցությամբ, վստահություն հայտնելով, որ երկու գերատեսչությունների միջև ձևավորված բարձր մակարդակի հարաբերություններն էլ ավելի կզարգանան՝ ի նպաստ մարդու իրավունքների և ազատությունների պաշտանության և հանցավորության դեմ համատեղ պայքարի:
Այնուհետև տեղի է ունեցել ՀՀ և ՌԴ դատախազությունների աշխատանքնային հանդիպումը, որը վարել է ՀՀ գլխավոր դատախազի տեղակալ Է. Բաբայանը:
