Կենտրոն եւ Նորք Մարաշ վարչական շրջանների ընդհանուր իրավասության դատարանում, դատավոր Գագիկ Պողոսյանի նախագահությամբ, շարունակվում է քննվել նախորդ տարի մայիսի 17-ին «Վերնիսաժ»-ի մոտ արձակված կրակոցների գործը:
Նիստի սկզբում դատարանը ներկայացրեց ամբաստանյալ Գոռ Առաքելյանի վերաբերյալ դատահոգեբուժական և դատահոգեբանական փորձաքննության արդյունքները: Փորձագիտական եզրակացության համաձայն՝ Գոռ Առաքելյանը հոգեկան հիվանդությամբ չի տառապել և չի տառապում, ուստի իր արարքների համար կարող է ճանաչվել մեղսունակ:
Նշենք, որ դատական նիստն այսօր հետաձգվեց, քանի որ դատախազը պատրաստ չէր հանդես գալ մեղադրական ճառով: Հաջորդ դատական նիստը տեղի կունենա օգոստոսի 20-ին ժամը՝ 15:00-ին:
Հիշեցնենք, որ մեղադրական եզրակացության համաձայն ՝ 31-ամյա Վալերիկ Հովհաննիսյանը իր ընկեր 37-ամյա Ներսես Մելքոնյանի հետ 2014թ. մայիսի 17-ին Երևան քաղաքի Վարդանանց փողոցի թիվ 18/2 շենքի ստորգետնյա ավտոկայանատեղիի մուտքի դարպասների մոտ ավտոմեքենան կայանելու շուրջ վիճաբանել է Գոռ Առաքելյանի հետ:
30-ամյա Գոռ Առաքելյանն ապօրինի կերպով ձեռք բերած ատրճանակով փորձել է դիտավորությամբ կյանքից զրկել Վալերիկ Հովհաննիսյանին և Ներսես Մելքոնյանին, ինչպես նաև անուղղակի դիտավորությամբ կյանքին վտանգ սպառնացող ծանր մարմնական վնասվածքներ է հասցրել Մնացական Սուքիասյանին ու Մյասնիկ Հայրապետյանին, իսկ Ալվինա Բադալյանին՝ միջին ծանրության վնաս:
Վեճի ընթացքում Վալերիկ Հովհաննսիյանն ու Ներսես Մելքոնյանն էլ կոպիտ կերպով խախտել են հասարակական կարգը, բացահայտ անհարգալից վերաբերմունք են ցուցաբերել հասարակության նկատմամբ՝ բարձրաձայն տալով սեռական բնույթի հայհոյանքներ: Սրանից բացի ընկերները բռնության գործադրմամբ հարվածել են Գոռ Առաքելյանին՝ պատճառելով առողջության թեթև վնասի հատկանիշներ չպարունակող մարմնական վնասվածքներ:
Նշենք նաև, որ երեք ամբաստանյալների համար էլ որպես խափանման միջոց ընտրվել է կալանավորումը:
Զառա Մանուչարյան
