Վարդան Օսկայանի փաստաբան Տիգրան Աթանսեյանը, ինչպես ավելի վաղ Iravaban.net-ին հայտնել էր, որ բողոքարկելու է Երևանի Կենտրոն և Նորք-Մարաշ վարչական շրջանի ընդհանուր իրավասության դատարանը մերժումը, այսօր բողոքարկել է Վերաքննիչ քրեական դատարանում:
Հիշեցնենք, որ Վարդան Օսկանյանի փաստաբան Տիգրան Աթանեսյանը դիմել էր դատարան՝ պահանջելով վերացնել Ազգային անվտանգության ծառայության կողմից մայիսի 25-ին «Սիվիլիթաս» հիմնադրամին և նրա հիմնադիր Վարդան Օսկանյանին առնչվող քրեական գործ (փողերի լվացման հատկանիշներով) հարուցելու մասին որոշումը:
«Դատարանի մերժումը հաստատեց, որ սա քաղաքական հետապնդում է Վարդան Օսկանյանի նկատմամբ»,- ասում է Տիգրան Աթանեսյանը:
Վարդան Օսկանյանը բազմիցս հայտարարել է, որ քրեական գործի հարուցումը քաղաքական հետապնդում է իր անձի նկատմամբ:
Այս առնչությամբ Օսկանյանը «Ֆեյսբուք»-ի իր էջում գրել էր. «ԱԱԾ տարածած հաղորդագրության բովանդակությունից ակնհայտ էր, որ հարուցված քրեական գործի շրջանակում ես հարցաքննվում եմ ոչ թե որպես վկա, այլ՝ կասկածյալ: Սա նկատի ունենալով՝ ես որոշեցի օգտվել իմ սահմանադրական իրավունքից և ցուցմունք չտալ»:
