223.3մլն դրամի լրացուցիչ հարկային պարտավորություններ՝ ՀՀ Ֆինանսների նախարարության հսկողական միջոցառումների արդյունքում

ՀՀ Հարկային ծառայությունը հրապարակել է Տնտեսության մեջ փաստաթղթաշրջանառության ապահովման նպատակով սեպտեմբերի 10-20-ը հարկ վճարողների հետ իրականացված աշխատանքների վերաբերյալ հաշվետվություն: Ֆինանսների նախարարությունը սեպտեմբերի 10-20-ը շարունակել է հարկային կարգապահության համապատասխան ցուցանիշների բարելավման պահանջը չընդունած կամ ոչ հիմնավոր բացատրություններ ներկայացրած հարկ վճարողների նկատմամբ շրջանառությունների և գների թերհայտարարագրումների, չգրանցված վարձու աշխատողների բացահայտման և մյուս ուղղություններով տարվող հարկային հսկողության աշխատանքները: Հաշվետու տասնօրյակում ավարտված բյուջեի հետ փոխհարաբերությունների ճշտության 13 ստուգումների արդյունքում արձանագրվել է 87.2մլն դրամի լրացուցիչ հարկային պարտավորություն: Աշխատողի աշխատանքի ընդունումն օրենսդրությամբ սահմանված կարգով գրավոր չձևակերպելու 19 ստուգումների արդյունքում հայտնաբերվել է 27 չգրանցված աշխատող և արձանագրվել է 3.3մլն դրամի հարկային պարտավորություն:

Մշտական հսկողության տակ առնված առավել խոշոր և թիրախային 100 ներմուծող ու արտադրող հարկ վճարողների մոտ 2014 թվականի սեպտեմբերի 10-ից 19-ն ընկած ժամանակահատվածում նախորդ տարվա նույն ժամանակաշրջանի համեմատ մատակարարների կողմից դուրս գրված հարկային հաշիվների քանակի աճը կազմել է 35 հազար 271 հատ կամ 68.2%, դրանցում արտացոլված շրջանառության գումարի աճը կազմել է 465.5մլն դրամ կամ 9%, իսկ օգոստոսի 2-րդ տասնօրյակի համեմատ հաշիվների քանակի աճը կազմել է 7959 հատ կամ 10.1%, շրջանառության աճը՝ 108.8մլն դրամ կամ 2%:

Ստվերային շրջանառությունների կրճատման ուղղությամբ իրականացվող միջոցառումներով Ֆինանսների նախարարությունն էլեկտրոնային հարկային հաշիվների շարժի դիտարկմամբ պարզել է, որ սեպտեմբերի 1-ից 10-ն ընկած ժամանակահատվածում ՀՀ ողջ տարածքում տարբեր պատճառներով տնտեսվարող սուբյեկտների կողմից անվավեր կամ չեղյալ է ճանաչվել 4565 էլեկտրոնային հարկային հաշիվ՝ 2.4մլրդ դրամ ընդհանուր արժեքով, այսինքն՝ նախորդ տասնօրյակի համեմատ անվավեր կամ չեղյալ ճանաչված հարկային հաշիվների քանակը նվազել է 37 հատով, իսկ ընդհանուր արժեքը՝ 300մլն դրամով:

Շարունակվում է նաև ցուցանիշների բարելավման պահանջն ընդունած հարկ վճարողների կողմից ճշտված հաշվարկների ներկայացման գործընթացը, որի արդյունքում առաջանում են լրացուցիչ հարկային պարտավորություններ: Այսպես, փաստաթղթաշրջանառության բարելավման, գների կարգավորման, դուրս գրվող հարկային հաշիվների քանակի ավելացման և նախորդ ժամանակաշրջանների համար ԱԱՀ-ի ճշտված հաշվարկների ներկայացման միջոցով 37 հարկ վճարողի մոտ առաջացել է 28.6մլն դրամ լրացուցիչ հարկային պարտավորություն: Տարեկան շահութահարկի ճշտված հաշվարկներով և հարկային բեռի ավելացմամբ 31 հարկ վճարողի 42.6մլն դրամի չափով լրացուցիչ պարտավորություն է հաշվարկվել:

Աշխատողների իրական թվաքանակի հայտարարագրման և աշխատավարձերի իրական մակարդակների արտացոլման հետևանքով 232 հարկ վճարողի մոտ աշխատողների թվաքանակն ավելացել է 48-ով և առաջացել է 16.9մլն դրամ լրացուցիչ եկամտային հարկ:

Ընդհանուր առմամբ սեպտեմբերի երկրորդ տասնօրյակում ՀՀ ՖՆ կողմից իրականացրած աշխատանքի և հսկողական միջոցառումների արդյունքում առաջացել է մոտ 223.3մլն դրամի լրացուցիչ հարկային պարտավորություն:

Մանրամասները՝ ՀՀ Հարկային ծառայության պաշտոնական կայքում:

Իրավաբան.net

Հետևեք մեզ Facebook-ում

  Պատուհանը կփակվի 6 վայրկյանից...   Փակել