Բարձրագույն դատական խորհրդում դատավոր Արտուշ Գաբրիելյանն իր եզրափակիչ ելույթում ասաց, որ ինքը չի գտնում, որ այս գործով ձերբակալված անձի փախուստի դիմելու հարցում կա իր մեղավորությունը, ինչը կարևոր հանգամանք է խորհրդակցական սենյակում վարույթի շրջանակում համապատասխան գնահատական տալու առումով։

«Մեկ բան էլ ավելացնեմ, ու ավարտենք իմ ասածը։ Պարո՛ն Անդրեասյան, նշված է՝ դիմել է փախուստի, մինչև օրս չի հայտնաբերվել․ հիմա, եթե 1 ժամ հետո Լեբեդովին բռնեմ, նա հայտնաբերվի, էլի Գաբրիելյա՞նն է մեղավոր։ Շնորհակալություն»։

ԲԴԽ-ն հեռացավ խորհրդակցական սենյակ՝ որոշում կայացնելու։

Հիշեցնենք, որ այսօր՝ սեպտեմբերի 17-ին, Բարձրագույն դատական խորհրդում քննարկվել է Երևանի առաջին ատյանի ընդհանուր իրավասության քրեական դատարանի դատավոր Արտուշ Գաբրիելյանին կարգապահական պատասխանատվության ենթարկելու հարցը։ Արդարադատության նախարարության կողմից կարգապահական վարույթ հարուցելու պատճառ է հանդիսացել նշված անձի (ՌԴ քաղաքացի Լեբեդովի) վերաբերյալ միջնորդությունը ուշ քննության առնելու, նրա ձերբակալության սահմանված ժամը լրանալու և վերջինիս կողմից փախուստի դիմելու հարցը։