Լեռնային Ղարաբաղից բռնի տեղահանված մեր հայրենակիցներին Հայաստանում ընդունելու, նրանց կարիքները գնահատելու, առաջին բժշկական օգնություն ցուցաբերելու, հաշվառելու, գրանցելու համար ՀՀ տարածքում բացվել է 60-ից ավելի հումանիտար կայան։ Սյունիքի եւ Վայոց ձորի մարզերում տեղակայված կայաններն առաջին օղակներն են։ Հաշվառումից եւ գրանցումից հետո կատարվում է տեղաբաշխում։
Այս մասին հայտնում են Ազգային ժողովից։
Աշխատանքներին միացել են նաեւ կամավորներ, որոնց թիվը գերազանցում է 600-ը։ Կամավորական աշխատանքներին մասնակցում է նաեւ ՀՀ Ազգային ժողովի աշխատակազմը։
Խորհրդարանի աշխատակազմի ներկայացուցիչներն աշխատանքներն իրականացնում են հերթափոխով՝ ամենօրյա ռեժիմով. այս օրերին մեր աշխատակիցներից կազմված խմբերը գտնվում են Վայքում:
