Ես նպատակ չունեմ որևէ շարժում առաջնորդելու, ես նպատակ ունեմ լիցք տալու մեր հասարակաությանը, որ մարդիկ հասկանան՝ մենք ծայրահեղ հումանիտար աղետի շեմին ենք կանգնած: Այս մասին այսօր՝ դեկտեմբերի 14-ին, լրագրողների հետ զրույցում ասաց Արցախի պետնախարարի խորհրդական Արտակ Բեգլարյանը:
Հիշեցնենք, որ նա անժամկետ նստացույց է սկսել Երևանում, ՄԱԿ-ի գրասենյակի առջև:
«Մենք այլևս ժամանակ չունենք կորցնելու: Մենք որևէ տեղ, որևէ հարցում զիջում չունենք անելու: Մենք չպետք է դառնանք էթիկայի և կոռեկտության զոհ: Հետևաբար բոլոր հնարավոր գործիքները պետք է կիրառենք, որ մեր կենսական կարմիր գծերը, մեր շահերն ու իրավունքները պաշտպանենք։ Սա է իմ հիմնական ուղերձը հայաստանյան հասարակությանը: Ես կարևորում եմ, որ հստակ բողոքի ակցիաներ լինեն կոնկրետ դեսպանատների առջև կամ այլ ճնշման ձևեր կիրառվեն այդ դեսպանատների հանդեպ, որպեսզի իրենք էլ հասկանան, որ հայաստանյան հասարակությունը չի համակերպվում այս իրավիճակի հետ: Հայաստանյան հասարակությունն ունի կոնկրետ իրավունքներ ու պահանջատեր է, որ իր հայրենիքը, իր հայրենակիցներին միջազգային հանրությունը պաշտպանի»,-ասաց նա:
Բեգլարյանը սփյուռքից ևս ակնկալում է, որ կիրականացնեն տարբեր ակցիաներ, իրենց կառավարություններից կպահանջեն սանկցիաներ Ադրբեջանի հանդեպ:
«Արցախի իմ հայրենակիցներին մաղթում եմ, որ ամուր լինեն, որևէ զրկանքներից չվախենան: Մենք դա տեսել ենք 1991-1992 թվականներին: Մենք 6 ամիս շարունակ տեսել ենք շրջափակոմ, տեսել ենք ռմբահարումներ, տեսել ենք սով, բայց մենք հաղթահարել ենք: Մենք, հայ ժողովրդի համախմբման միջոցով կարողացել ենք մեր կենսական շահերն ու իրավունքները պաշտպանել: Նույնը մենք կարող ենք անել հիմա, ուղղակի պետք է դիմանալ, քանի որ մենք չունենք իրավունք զիջելու: Մենք միայն պետք է զգանք, որ միայնակ չենք: Առաջին հերթին հայ ժողովուրդը կանգնած է մեր թիկունքին, բոլոր հնարավոր գործողություններով և նաև ինքնազոհողություններով: Այդ դեպքում մենք կկարողանանք այս փուլը հաղթահարել։ Ավելի երկարաժամկետ ջանքերով՝ հայց պետականությունը ներսից ամրացնել և մեր շահերը պաշտպանել»,-ասաց նա:
Արտակ Բեգլարյանը նշեց, որ նստացույցն ու իր անհնազանդության ակցիաները առնչություն չունեն իր աշխատանքի և լիզորությունների հետ:
«Ես արձակուրդի դիմում եմ գրել և գտնվում եմ արձակուրդում: Ըստ կարիքի՝ պատրաստ եմ նաև աշխատանքից դուրս գալ, որովհետև ինձ համար սա սկզբունքային, ազգային, պետական և անձնական խնդիր է: Ես կարծում եմ, որ հիմա այսպես կարող եմ պայքարել իմ ժողովրդի համար»,-ասաց նա:
