Երևանի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, բավարարել է Գևորգ Մելիքյանի (Օշականցի Գևորիկ) նկատմամբ ընտրված խափանման միջոց կալանավորումը գրավով փոխարինելու մասին պաշտպանների միջնորդությունը: Այս մասին Iravaban.net-ի հետ զրույցում ասաց փաստաբան Մնացական Մարուքյանը:
«Միջնորդել էինք խափանման միջոցը փոխել՝ երկարատև կալանքի տակ գտնվելու հիմքով, որովհետև նա արդեն 2 տարի 3 ամիս է ինչ կալանավորված է: Դրան գումարած նա վատառողջ էր: Դրա համար խափանման միջոցը փոխվեց գրավով՝ 60 միլիոն դրամ»,-նշեց նա:
Պաշտպանի խոսքով՝ գրավը վճարվել է, Գևորգ Մելիքյանը ազատ է արձակվել:
«Ավելի վաղ՝ միջնորդություն էինք ներկայացրել, որպեսզի նրա առողջական վիճակի վերաբերյալ փորձաքննություն նշանակվի, դա ևս կարող էր հիմք հանդիսանալ, որ նա ազատ արձակվեց»,-ասաց Մնացական Մարուքյանը:
Հիշեցնենք, որ Գևորգ Մելիքյանը, մեղադրվում է ՀՀ քրեական օրենսգրքով 223.1-րդ հոդվածի 1-ին մասի հատկանիշներով, այն է՝ հանցավոր համագործակցություն ստեղծելը կամ հանցավոր համագործակցություն ղեկավարելը։
