Ռուսաստանը «կարող է և պետք է» ավելացնի գազի մատակարարումները Եվրոպա ավելին, քան պայմանագրային ծավալներով գործող խողովակաշարերի միջոցով՝ կանխելու համար մայրցամաքում էներգետիկ ճգնաժամը, որը հնարավոր է ցուրտ ձմռան դեպքում, ասել է ԱՄՆ Պետդեպարտամենտի ներկայացուցիչ Ամոս Հոխշտեյնը։
Այս մասին հայտնում է «ՌԻԱ Նովոստին»։
Նա Գերմանիային կոչ է արել Ռուսաստանին հասկացնել, որ նա չի կարողանա շահագործման հանձնել «Հյուսիսային հոսք 2»-ը մինչև հաջորդ տարվա մարտը և պետք է օգտագործի առկա երթուղիները՝ ներառյալ ուկրաինական խողովակաշարը՝ մատակարարումների ընդլայնման համար:
«Միակ մատակարարը, որն ի վիճակի է փոխել իրավիճակը եվրոպական էներգետիկ շուկայում այս ձմռանը, Ռուսաստանն է: Նրանք կարող են ավելացնել արդյունահանումը, նրանք պետք է դա անեն, նրանք պետք է մատակարարեն արդեն գոյություն ունեցող գազատարներով»,- ճեպազրույցում ասել է Հոխշտեյնը:
«Եթե Ռուսաստանը գազ ունի «Հյուսիսային հոսքի» համար, ապա այն ունի ծավալներ Ուկրաինայի գազի փոխադրման համակարգի և այլ երթուղիների համար: Նրանք պետք է օգտագործեն դրանք», – ավելացրել է նա:
Դիվանագետը կրկնել է, որ ԱՄՆ-ը չի փոխում բացասական վերաբերմունքը «Հյուսիսային հոսք 2»-ի նկատմամբ, այլ դրա կառուցմանը հակադրվելու փորձերից անցել է դրա շահագործման բացասական հետևանքների հարթեցմանը։
Հոխշտեյնը կանխատեսում է, որ այս ձմռանը Եվրոպան կարող է բախվել էներգակիրների պակասի, եթե սովորականից ավելի ցուրտ լինի և վառելիքի գները բարձրանան հաջորդ տասը տարիների ընթացքում:
Հարցին, թե ի վիճակի է արդյոք ԱՄՆ-ն օգնել Եվրոպային հեղուկ գազ մատակարարելով, նա պատասխանեց, որ ամերիկյան ընկերությունները նման վառելիքի բավարար պաշարներ ունեն, սակայն իշխանություններն իրավունք չունեն իրենց արտահանման ուղղություններ թելադրել։
