Փաստաբան Էրիկ Ալեքսանյան ֆեյսբուքյան ուղիղ եթերի ժամանակ հայտարարել է, որ այցելել է իր պաշտպանյալ Առուշ Առուշանյանին և վերջինս իր շնորհակալությունն է հայտնում Գորիսի ժողովրդին՝ իրեն ընտրելու համար։
«Նա վստահ էր, որ հաղթելու է, քանի որ գորիսցին իր կողքին է գտնվում։ Պարոն Առուշանյանը բոլորին ջերմ բարևներ էր ուղարկում, մեծ շնորհակալություն էր հայտնում։ Նա ցանկանում է, որ բոլորը իմանան՝ սա հաղթանակի սկիզբն է։ Պարոն Առուշանյանը հենց դուրս եկավ, բոլորն են համոզվելու, որ այն, ինչ կատարվում է, օրենքի, իրավունքի հետ աղերս չունի։ Գորիսի ժողովուրդը շուտով դիմավորելու է իր նորընտիր քաղաքապետին»,-նշել է նա։
Հիշեցնենք, որ Գորիս խոշորացված համայնքում բոլոր 18 ընտրատեղամասերից ստացված նախնական արդյունքներով՝ Առուշ Առուշանյանը հաղթել է ՏԻՄ ընտրություններում։
Առուշ Առուշանյանի օգտին քվեարկել է 6256 ընտրող, «Քաղաքացիական պայմանագիր» կուսակցության թեկնածու Վլադիմիր Աբունցի օգտին է քվեարկել 3590 ընտրող։
Մասնակցել է ընտրողների 50,4 տոկոսը։
