Քարոզարշավի 3-րդ օրը Գյումրիում վարչապետի պաշտոնակատար Նիկոլ Փաշինյանը ներողություն խնդրեց հայ ժողովրդից այս ընթացքում ունեցած թերացումների ու բացթողումների համար՝ նշելով, որ այժմ հանձնված է ՀՀ քաղաքացիների դատին և հունիսի 20-ին պետք է հրապարակվի իր «դատավճիռը»։
«Ես բերել ու ձեր դատին եմ հանձնել նաև ՀՀ-ի բոլոր ժամանակների ղեկավարներին և սա պատմական մի հանգրվան է, որտեղ ժողովուրդը պիտի ասի իր խոսքը անցյալի, ներկայի ու ապագայի մասին»,-նշեց նա։
Փաշինյանի խոսքով՝ գուցե 2018 թվականի հեղափոխությունը ուշացավ և գուցե դրանում կա նաև իր մեղքը։ Այնուհետև ներկայացրեց գործող կառավարության կատարած աշխատանքը, որը վերնագրել էր «30 տարվա ընթացքում առաջին անգամ․․․»։
Ելույթից հետո Փաշինյանն առաջարկեց Գյումրու հրապարակից երթով շարժվել դեպի մարզպետարան։
Նա չանդրադարձավ 3-րդ նախագահի կողմից հրապարակված ձայնագրությանը։
