Առողջապահության նախարարի տեղակալ Գևորգ Սիմոնյանը հայտնում է, որ ՀՀ ամբողջ տարածքում այս պահին թվով 20 բժշկական հաստատություն ամբողջությամբ կամ մասնակի վերապրոֆիլավորվել են «Կովիդ կենտրոնների»:
«Բոլոր կենտրոնները այս պահին գերծանրաբեռնված են: Մեր պրոֆեսիոնալ բուժանձնակազմը աշխատում է ուժերի գերլարումով միաժամանակ փորձելով լինել հնարավորինս նրբանկատ՝ ցանկացած պացիենտի թե՛ առողջական վիճակի, թե՛ անձի նկատմամբ: Խնդրում և ակնկալում եմ փոխադարձ վերաբերմունք:
Հ.Գ. խնդրում եմ պահպանել հակահամաճարակային կանոնները»,-գրել է նա:
Մարտի 28-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 190317 դեպք, որոնցից 171506-ն` առողջացած, 3464-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 14466 պացիենտ: Ընդհանուր առմամբ կատարվել է 838839 թեստավորում:
Այսպիսով` երեկ կատարվել է 4927 թեստավորում, որից հաստատվել է կորոնավիրուսային հիվանդության 777 նոր դեպք: Ունենք 603 առողջացած և 14 մահվան դեպք:
