34-ամյա Սուրենը և նրա կինը` 36-ամյա Մարինեն ամբաստանյալի աթոռին են դեղատնից խոշոր չափի գումար հափշտակելու համար: Այս մասին տեղեկանում ենք «Դատալեքս» դատական տեղեկատվական համակարգից:
Համաձայն մեղադրական եզրակացության` Սուրենը Գյուրջյան 7/3 հասցեում գտնվող «Ալֆա-Ֆարմ» ՓԲԸ-ի դեղատնից գաղտնի հափշտակությունը կատարել է` համաձայնեցնելով կնոջ հետ, ով եղել է դեղատան վարիչը և դեղատան մուտքի դռան բանալին տվել է ամուսնուն:
Մարինեն իր հերթափոխը հանձնել է գիշերային հերթափոխի աշխատակցին, նրա հյութի մեջ լցրել է «Դիմեդրոլ» տեսակի քնաբեր: Այնուհետև 2013թ. սեպտեմբերի 23-ին ժամը 4-ի սահմաններում Սուրենը միայնակ գնացել է դեղատուն, ապօրինի մուտք է գործել այնտեղ և դրամարկղից գաղտնի հափշտակել 873.000 ՀՀ դրամ և դիմել փախուստի:
Գործը քննվում է Ավան և Նոր Նորք վարչական շրջանների ընդհանուր իրավասության դատարանում` դատավոր Դավիթ Հարությունյանի նախագահությամբ:
Հ.Գ. Ամբաստնյալների անունները փոխված է:
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
