ԱՄՆ Հավայիի նահանգի սենատը անցյալ շաբաթ միաձայն ընդունել է բանաձև, որով ճանաչել է Հայոց ցեղասպանությունը և ապրիլի 24-ը հռչակել որպես Հայոց ցեղասպանության հիշատակի օր: Այս մասին տեղեկացնում է «asbarez.com»-ը:
«Սենատը միանում է Ներկայացուցիչների պալատին, Հավայիի ամերիկահայ համայնքին և համայն աշխարհի հայերին՝ ճանաչելով ու հարգանքի տուրք մատուցելով նրանց, ովքեր սպանվել ու հալածվել են Հայոց ցեղասպանության ժամանակ ու ստիպողաբար քշվել աշխարհով մեկ՝ չմոռանալու համար մարդկության դեմ այս զարհուրելի հանցագործությունները»,- նշվում է բանաձևում:
Հավայիի նահանգի սենատորներն, ովքեր ներկայացրել են այս օրինագիծը, ներառյալ՝ Սյուզան Չուն Օքլենդը, Դոնովան Դելա Քռուզը,Ուիլ Էսփերոն, Բռին Հարիմոթոն, Լես Իհարան, Լոռեն Ինոուին և Ռասել Ռուդերմանը ամերիկահայhամայնքի ներկայացուցիչ Արթուր Արթենյանի հետ միասին ներկա են գտնվել բանաձև-օրենքի ստորագրմանը:
