Շտապօգնության աշխատակից 53-ամյա Ռաիսա Կետիկյանը ամբաստանյալի աթոռին էր հայտնվել մահացած մարդու ոսկե ականաջօղերը գողանալու համար: Այս մասին տեղեկանում ենք «Դատալեքս» դատական տեղեկատվական համակարգից:
Համաձայն մեղադրական եզրակացության` Ռաիսա Կետիկյանը աշխատել է Երևանի քաղաքապետարանի «Շտապօգնություն» պետական փակ բաժնետիրական ընկերությունում որպես ֆիլդշերական բրիգադայի սանիտար: 2014 թվականի սեպտեմբերի 21-ին իր հերթապահության ժամանակ ահազանգ ստանալով, որ Մաշտոցի պողոտայի 51 շ. 36 բնակարանում դիակ կա, շտապօգնության մեքենայի վարորդի հետ մեկնել են վերը նշված բնակարան, և դիակը պատգարակով տեղափոխել են շտապօգնության ավտոմեքենայի սրահ: այս ընթացքում էլ Ռաիսան դիակից գաղտնի հափշտակել է մոտ 50.000 դրամ արժողության ոսկյա ականջօղերը:
Գործն ուղարկվել է Կենտրոն և Նորք-Մարաշ վարչական շրջանների ընդհանուր իրավասության դատարան, մակագրվել դատավոր Մնացական Մարտիրոսյանին: Դատարանն այս տարվա մարտի 20-ին Ռաիսա Կետիկյանի նկատմամբ քրեական հետապնդումը դադարեցնելու որոշում է ընդունել` հիմք ընդունելով այն, որ ոստիկանությունում հանցագործության մասին հաղորդում տվողը` մահացած անձի հարազատը հետ է վերցրել իր բողոքը:
Դատարանի որոշմամբ, մեղադրյալի նկատմամբ ընտրված խափանման միջոց չհեռանալու մասին ստորագրությունը վերացվել է, և իրեղեն ապացույց ճանաչված մեկ զույգ ոսկե ականջօղը վերադարձվել է մահացածի հարազատին:
Հ.Գ. Անունները փոխված են:
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
