Հակակոռուպցիոն դատարանում, դատավոր Կարապետ Բադալյանի նախագահությամբ սեպտեմբերի 14-ին կայացավ Արտյոմ Խաչատրյանի և մյուսների ապօրինի ծագում ունեցող գույքի գործով դատական նիստը։ Iravaban.net-ի փոխանցմամբ պատասխանողի ներկայացուցիչ Գնել Մուղնեցյանը դեմ է արտահայտվել նիստի տեսանկարահանմանը և ձայնագրմանը՝ հիմնավորելով, որ դատական նիստի ընթացքում ներկայացվելու են անձնական տվյալներ, բանկային գաղտնիք հանդիսացող տվյալներ և վճարման կարգադրություններ։ Նրա միջնորդությամբ դատական նիստը անցկացվեց դռնփակ։

Գործի նախապատմությունը.

ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունը 2023թ. հոկտեմբերի 9-ին հայցադիմում է ներկայացրել ՀՀ հակակոռուպցիոն դատարան ընդդեմ 11 պատասխանողների, այդ թվում՝ ՊԵԿ նախկին նախագահ և ֆինանսների նախկին նախարար Գագիկ Խաչատրյանի որդու՝ Արտյոմ Խաչատրյանի, ինչպես նաև Քրիստինա Սաֆարյանի, «ՆԱԿՐԻՆԱՄԱՆԳ» ընկերության, «ԱՅՅՈՒ ԹԵԼԵՔՈՄՅՈՒՆԻՔԵՅԹ ԼԻՄԻԹԵԴ» ընկերության, «WRH INC» ընկերության և այլոց։

Գործի կարևոր փաստերը.

Ըստ հայցադիմումի՝ Արտյոմ Խաչատրյանին և մյուսներին պատկանող մի շարք գույքեր և ընկերություններում մասնակցություններ ունեն ապօրինի ծագում։ Հայցը ներառում է դրանց բռնագանձման պահանջ։ Գործի նյութերի համաձայն՝ Արտյոմ Խաչատրյանը օժանդակել է իր հորը՝ Գագիկ Խաչատրյանին (ՀՀ ֆինանսների նախկին նախարարին, ՊԵԿ նախկին նախագահին), պաշտոնեական դիրքն օգտագործմամբ յուրացման եղանակով հափշտակելու առանձնապես խոշոր չափերով՝ 1,506,169,583 ՀՀ դրամի գումար։

Գործին կցվել են բազմաթիվ անշարժ գույքի միավորներ, ավտոմեքենաներ և ընկերություններում մասնակցություններ, այդ թվում՝

• Երևանում և Կոտայքի մարզում գտնվող բազմաթիվ հողատարածքներ և բնակարաններ
• Ինը ավտոմեքենա, որոնց թվում՝ BMW ACTIVEHYBRID 7L 4.4 և MERCEDES-BENZ AMG GLC 43 4MATIC մակնիշի մեքենաներ
• Մի շարք ընկերություններում մասնակցություններ, այդ թվում՝ «ՅՈՒՔՈՄ», «ՖՐԱՆՉԱՅԶԻՆԳ ՖՈՒԴ» և այլն

Գործի դատավարական զարգացումները.

Գործով առաջին նիստը կայացել է 2024 թվականի հունվարի 23-ին։ Նշանակվել և կայացել են մի շարք նախնական դատական նիստեր։

Գործի քննության ընթացքում պատասխանողների կողմից երկու անգամ ներկայացվել է հայցային վաղեմություն կիրառելու միջնորդություն։ Առաջին միջնորդությունը ներկայացվել է Արտյոմ Խաչատրյանի ներկայացուցիչ, փաստաբան Գնել Մուղնեցյանի կողմից 2024թ. սեպտեմբերի 30-ին, իսկ երկրորդը՝ պատասխանող Արամ Անտոնյանի կողմից 2024թ. նոյեմբերի 29-ին։ Երկու միջնորդություններն էլ մերժվել են դատարանի կողմից՝ համապատասխանաբար 2024թ. հոկտեմբերի 21-ի և 2025թ. հունվարի 10-ի որոշումներով։

Պատասխանողների ներկայացուցիչների փաստարկները հիմնված էին այն դրույթի վրա, որ «Ապօրինի ծագում ունեցող գույքի բռնագանձման մասին» օրենքում 2022թ. հուլիսին կատարված փոփոխություններով երկարաձգվել է ուսումնասիրության ժամկետը՝ երկու տարուց դարձնելով այն երեք տարի, ինչը, ըստ նրանց, հակասում է Սահմանադրությամբ ամրագրված՝ անձի իրավական վիճակը վատթարացնող օրենքների և այլ իրավական ակտերի հետադարձ ուժի արգելքի սկզբունքին։

Դատարանը մերժելով այս միջնորդությունները՝ արձանագրել է, որ ուսումնասիրության ժամկետը չի կարող նույնացվել հայցային վաղեմության ժամկետի հետ, և հայցադիմումը ներկայացվել է օրենքով սահմանված պահանջների պահպանմամբ։

Գործի նյութերում իրեղեն ապացույց է հանդիսանում թիվ 01044106 կադաստրային գործը։ Ըստ դատախազության՝ գործով ներկայացված է մոտ 750 միլիոն ՀՀ դրամի հայց։