Մարտի 14-ին Հայաստանի ազգային պոլիտեխնիկական համալսարանում գործարկվեց 150կՎտ դրվածքային հզորությամբ ֆոտովոլտային կայանը. այն թվով 4-րդ է ՀԱՊՀ տարածքում:
Կայանի գործարկման արարողությանը մասնակցել են ՀԱՊՀ Հոգաբարձուների խորհրդի նախագահ, Երևանի քաղաքապետ Տիգրան Ավինյանը, ՀԱՊՀ ռեկտոր Գոռ Վարդանյանը, Հայաստանի վերականգնվող էներգետիկայի և էներգախնայողության հիմնադրամի (R2E2) տնօրեն Կարեն Ասատրյանը, ուսանողներ, բուհի պրոֆեսորադասախոսական անձնակազմ, աշխատակիցներ, գործընկեր կառույցների ներկայացուցիչներ:
Իր ելույթի խոսքում Տիգրան Ավինյանը նշեց, որ այս ծրագրերը իրականացվում են մի քանի տասնամյակի համար, և որ Երևանի Պոոլիտեխնիկական համալսարանը ինքն արտադրի իր իսկ էլեկտրաէներգիան և էլեկտրաէներգիայի արտադրման տեսանկյունից լինի ինքնավար:
«Ես ուզում եմ բոլորի ուշադրությունը գրավել այս, թվում է, թե, տեխնոլոգիական, բայց շատ կարևոր, մարդակենտրոն ծրագրի վրա, որը միտված է տեխնոլոգիաների զարգացմանը, կանաչ էներգիայի արտադրությանը, և ամենակարևորը՝ կրթությանը: Այս բոլոր ծրագրերը իրականացվում են Պոլիտեխնիկի ուսանողների կողմից՝ նախագծումից, մինչև փաստացի իրականացում և հետագա նաև կառավարում», – ասաց քաղաքապետը:
ՀԱՊՀ ռեկտոր Գոռ Վարդանյանն էլ իր ելույթի խոսքում նշեց, որ այս գործընթացը մի քանի կարևորագույն խնդիր է լուծում:
«Առաջինը՝ Հայաստանի ազգային պոլիտեխնիկական համալսարանը, լինելով տեխնոլոգիական համալսարան, խրախուսում է վերականգնվող էներգիայի, կանաչ էներգիայի աղբյուրների օգտագործումը և տարածումը, առաջին հերթին՝ կրթական հաստատություններում: Երկրորդը՝ ՀԱՊՀ-ն, ունենալով Էներգետիկայի և էլեկտրատեխնիկայի ինստիտուտ, նպատակ ունի պատրաստել այնպիսի մասնագետներ, ովքեր ՀՀ-ում հենց նմանօրինակ խնդիրներ կլուծեն, և այդ խնդիրները լուծելով՝ կօգնեն, որ մասնավոր ոլորտում այն շատ ավելի արագ զարգանա», – ասաց Գոռ Վարդանյանը՝ հավելելով, որ հաջորդ կարևորագույն կոմպոնենտը այն լուրջ էներգախնայողության, ֆինանսների տեսակետից՝ համալսարանի տնտեսումների հնարավորություն է բերում:
«Այդ տնտեսված միջոցները բուհը կարողանում է ուղղել կրթության որակի բարձրացմանը, հետազոտական աշխատանքներին, ակադեմիական անձնակազմի աշխատավարձի բարձրացմանը: Ծրագրված է կառուցել 750 ԿՎՏ հզորությամբ կայանների համակարգ, որն ամբողջությամբ կծածկի բուհի էներգետիկ կարիքները», – նշեց ռեկտորը:
ՀԱՊՀ մասնագետները ներկաներին ծանոթացրել են կայանի նախագծման ու աշխատանքի առանձնահատկություններին, ցուցադրել իրական ժամանակում ընթացող պրոցեսներն ու դրանց կառավարման հնարավորությունները:
