ՀՀ Ազգային ժողովի կողմից 2024 թվականի հունիսի 12-ին ընդունված «Հայաստանի Հանրապետության հարկային օրենսգրքում փոփոխություններ կատարելու մասին» օրենքում կատարված փոփոխությունները փաստաբանները համարում են խնդրահարույց։
Հիշեցնենք, որ Օրենքով նախատեսվում է փաստաբանական ծառայությունների մատուցումից առաջացող շրջանառության հարկը 2025 թվականի հունվարի մեկից վերացնել, որպիսի պայմաններում փաստաբանները գործելու են հարկման ընդհանուր համակարգում, ըստ այդմ` մատուցվող փաստաբանական ծառայությունների համար կիրառվելու է 20 տոկոս ԱԱՀ: Դրանից զատ, վճարվելու է նաև շահութահարկ, որի դրույքաչափը կազմում է 18 տոկոս:
«Օրենսդրության այս փոփոխությունը, առաջին հերթին, ուղիղ կպնելու է հենց քաղաքացու գրպանին, քանի որ մենք՝ փաստաբաններս, մեր ծառայությունները մատուցում ենք վճարովի հիմունքներով և հարկաման այս ռեժիմը բերելու է ծառայությունների թանկացման՝ առնվազն 38 տոկոսով»,-այս մասին Iravaban.net-ի հետ զրույցում ասաց փաստաբան Կարինե Բաղդասարյանը։
Փաստաբան Նարեկ Գալոյանը նշում է, որ փաստաբանները գերշահույթ ստացող անձինք չեն և ահռելի բեռ ունեն։
«Հարկային բեռի ավելացումը չի հանգեցնելու պետության հարկային եկամուտների ավելացմանը, բազմաթիվ խնդիրներ է ստեղծելու»,-նշեց նա։
Փաստաբան Տաթևիկ Բուջատյանն ընդգծում է, որ խնդիրները կլուծվեն այն դեպքում, երբ վերանայվի հարկման նոր համակարգը՝ փաստաբանների նկատմամբ։
«Քաղաքացին չի կարողանալու իր իրավունքների իրացման համար դիմել մասնագետներին և ստանալ արդյունավետ օգնություն։ Ես 7 տարի հանրային պաշտպան եմ եղել և տեղյակ եմ հանրային պաշտպանի գրասենյակի գերծանրաբեռնվածությունից»,-նշեց նա։
