Հարգելիներս, արդեն գրեթե 8 ամիս է խնդրում ու առաջարկում եմ ձեզ, որպեսզի կոնկրետ օր սահմանեք, ինչպես դա արվեց կողային ապակիների լուսաթափանցելիության դեպքում և զգուշացնեք, որ այդ օրվանից հետո «ներում» չի լինելու:
Այս մասին ֆեյսբուքյան իր էջում գրել է Ազգային ժողովի «Քաղաքացիական պայմանագիր» խմբակցության պատգամավոր Արսեն Թորոսյանը։
«Վարորդների և ուղևորների ճնշող մեծամասնությունը այդ օրվանից սկսած չի խախտելու ամրակապման կանոնները:
Նաև բոլոր պարեկներին հրահանգեք, որ իրենք էլ ամրակապվեն և օրինակ ծառայեն մյուս վարորդների համար: Մինչև հենց ոստիկանները չհավատան իրենց գործի կարևորությանը և իրենք առաջինը չպահպանեն օրենքը, մյուսներից դա պահանջելը չի ստացվելու»,-նշել է նա:
Հիշեցնենք, որ ՆԳՆ ոստիկանությունը հաղորդագրություն էր տարածել՝ հորդորելով քաղաքացիներին անվերապահորեն հետևել ամրագոտու կիրառման կանոններին։
