Հայաստանի Հանրապետության օդանավակայանների աերոդրոմների (Հայաստանի Հանրապետության քաղաքացիական և քաղաքացիական ու ռազմական ավիացիայի օդանավերի համատեղ բազավորման և համատեղ օգտագործման աերոդրոմներ) շրջակայքում թռչունների բախումն օդանավերի հետ հաշվառվում են և տեղեկատվությունները ներկայացվում են Քաղաքացիական Ավիացիայի Միջազգային Կազմակերպություն (ԻԿԱՕ):
Աերոդրոմներում և դրանց շրջակայքում թռչունների հետ օդանավերի բախումների վերաբերյալ հաշվետվությունների հավաքումը, հաշվառումը և ամփոփ տեղեկատվության մշակումն իրականացնում է ՀՀ ԿԱ Քաղաքացիական ավիացիայի Գլխավոր վարչությունը:
Եթե թռչունների հետ օդանավի բախումը տեղի է ունեցել Աերոդրոմների տարածքում և առկա են թռչունների մնացորդներ (փետուրներ, մարմնի մասեր), ապա դրանք Աերոդրոմ շահագործողի կողմից ներկայացվում են փորձաքննության` թռչունների տեսակները և չափերը որոշելու նպատակով:
Հաշվետվության հիմնական ձևը Գլխավոր վարչություն է ներկայացվում Աերոդրոմ շահագործողի կողմից թռչունների հետ օդանավի բախման դեպքի ուսումնասիրությունների ավարտից հետո երկօրյա ժամկետում:
Հաշվետվության հիմնական ձևը լրացվում է Աերոդրոմ շահագործողի, տվյալ աերոդրոմում օդային երթևեկության կառավարում (ՕԵԿ) իրականացնող մարմնի կարգավարի և օդանավի հրամանատարի կամ թռիչքային անձնակազմի անդամի կողմից համատեղ:
Հաշվետվության լրացուցիչ ձևը Գլխավոր վարչություն է ներկայացվում Հայաստանի Հանրապետությունում գրանցված Օդանավ շահագործողների կողմից: Հայաստանի Հանրապետությունում գրանցված Օդանավ շահագործողները Գլխավոր վարչություն են ներկայացնում հաշվետվության լրացուցիչ ձևը նաև այն դեպքում, եթե թռչունների հետ օդանավի բախումը տեղի է ունեցել օտարերկրյա պետությունների աերոդրոմներում:
Հաշվետվության լրացուցիչ ձևերը ներկայացվում են թռչունների հետ օդանավի բախման դեպքի ուսումնասիրությունների ավարտից հետո`
ա. մեկշաբաթյա ժամկետում, եթե թռչունների հետ օդանավի բախումը տեղի է ունեցել Հայաստանի Հանրապետության աերոդրոմներում,
բ. երկշաբաթյա ժամկետում, եթե թռչունների հետ օդանավի բախումը տեղի է ունեցել օտարերկրյա աերոդրոմներում:
Եթե Աերոդրոմներում կամ դրանց շրջակայքում թռչունների բախումը տեղի է ունեցել օտարերկրյա պետության Օդանավ շահագործողի օդանավի հետ, որի մասին օդանավի անձնակազմը հայտնել է ՕԵԿ մարմնի կարգավարին, ապա այդ տեղեկությունը ՕԵԿ մարմնի կողմից ներկայացվում է Գլխավոր վարչություն:
Հիմնական և լրացուցիչ հաշվետվությունների առկայության դեպքում Գլխավոր վարչությունը յուրաքանչյուր ամսվա համար մինչև հաջորդ ամսվա 15-ը ԻԿԱՕ է ներկայացնում հաշվետվություններ թռչունների հետ օդանավերի բախման յուրաքանչյուր դեպքի համար:
